Prezıdent: Ozyq memlekettiń qazyǵy — ǵylym, al qazynasy — ǵalym
ASTANA. KAZINFORM — Memleket basshysy Qasym-Jomart Toqaev ǵalymdardy marapattaý rásiminde sóz sóıledi. Bul týraly Aqorda málim etti.
— Adamzattyń barlyq jetistigi — ǵalymdardyń zııatkerlik eńbeginiń jemisi» «Eń aldymen, Ǵylym qyzmetkerleri kúni barshańyzǵa qutty bolsyn deımin. Osy belgili mereke qarsańynda Aqordaǵa jınalyp, bas qosý jaqsy dástúrge aınaldy. Bul — elimizdiń ǵalymdar qaýymyna degen erekshe qurmeti jáne aıryqsha yqylasynyń kórinisi. Sebebi kez kelgen damyǵan, ıaǵnı, ozyq memlekettiń qazyǵy — ǵylym, al qazynasy — ǵalym. Ár eldiń ǵylymı áleýeti — onyń abyroı-bedeli men kúsh-qýatynyń ólshemi desek, qate bolmaıdy. Ǵylymǵa basymdyq beretin, ǵalymyn qadirleıtin, basqasha aıtsaq, „ǵylym-bilim bar jurttar“ ǵana órkenıettiń órine shyǵady. Bul — aqıqat. Túptep kelgende, adamzattyń barlyq jetistigi ǵalymdardyń zııatkerlik eńbeginiń jemisi ekeni sózsiz. Qazir osy zalda túrli salada zor tabysqa jetken zerdeli zertteýshilerimiz otyr. Sizder ult sapasyn arttyrýǵa, halyqtyń ál-aýqatyn jaqsartýǵa mol úles qosyp kelesizder. Barshańyzǵa shynaıy rızashylyǵymdy bildiremin. Hakim Abaı aıtyp ótkendeı, „Adam balasy adam balasynan aqyl, ǵylym, ar, minez degen nárselermen ozbaq“. Bul — eshqashan ózektiligin joǵaltpaıtyn taǵylym. Biz básekege qabiletti el bolamyz desek, eń aldymen, ǵylymdy damytyp, jańa tehnologııany, jasandy ıntellektini meńgerýimiz kerek, — dedi Memleket basshysy.
Buǵan deıin Qasym-Jomart Toqaev ǵylymdy qoldaý baǵytynda Úkimetke tapsyrma bergen bolatyn.
