Prezıdent ozyq elderdiń negizgi qozǵaýshy kúshin atady

TÚRKІSTAN. KAZINFORM — Memleket basshysy Qasym-Jomart Toqaev Túrkistan oblysynyń jurtshylyǵymen kezdesýde sóz sóıledi, dep habarlaıdy Aqordanyń baspasóz qyzmeti.  

Prezıdent atap ótkendeı, sarapshylardyń paıymdaýynsha, jasandy ıntellekt dáýirinde adamzat sanynyń sheshýshi faktor retindegi róli azaıady. 

— Sondyqtan másele — halyqtyń sanynda emes, másele — adamdardyń bilimi men qabiletinde bolmaq. Soǵan baılanysty biz bárimiz jáne eń aldymen Úkimet bilim berý salasyna basa mán berýi kerek. Ozyq, damyǵan memlekettiń bári kópbaǵytty saıasatty qatań ustanatyn boldy, olardyń kóbi ózderine qabiletti, daryndy adamdardy, ǵalymdardy, ásirese, jastardy tartyp jatyr, olarǵa qolaıly jaǵdaı jasaýda. Sebebi ozyq elderdiń negizgi qozǵaýshy kúshi — bilimdi, aqyldy, eńbekqor, uqypty adamdar. Bul — aqıqat. Biz de ozyq el bolamyz desek, osy saıasatty tıimdi túrde iske asyrýymyz kerek. Adam kapıtalynyń sapasyn meılinshe jetildirip, kúsheıtýimiz qajet. Bul — jańa dáýirdegi básekege toly ómirdiń zańy, buryn-sońdy bolmaǵan, múlde jańa qubylys. Osy zamanaýı úrdisti ashyq kózqaraspen sanaly túrde qabyldap, úlken daıyndyqpen qarsy alýymyz kerek, — dedi Toqaev.

Osyǵan deıin Memleket basshysy quryltaı, Halyq keńesi ınstıtýttary arqyly halyq bıliginiń ozyq úlgisi qalyptasatynyn aıtty.