Prezıdent Ózbekstannyń Olıı Májilisi Senatynyń tóraǵasy Tanzıla Narbaevany qabyldady
Kezdesý barysynda parlamentaralyq baılanystardy damytýǵa jáne memleketaralyq qatynastarǵa tyń serpin berýge baǵyttalǵan qazaq-ózbek yntymaqtastyǵynyń ózekti máseleleri talqylandy.
Qasym-Jomart Toqaev Tanzıla Narbaevaǵa iltıpat bildire otyryp, búgin Astanada ótken mańyzdy bastama – «Ortalyq Azııa elderi áıelderiniń dıalogy» atty sharany qoldaǵany jáne jıynǵa belsendi qatysqany úshin Olıı Májilisi Senatynyń tóraǵasyna rızashylyǵyn bildirdi. Memleket basshysy osy alańnyń birinshi otyrysynyń qorytyndysy óńirdegi ózara is-áreketti jandandyrýǵa yqpal etetinine, Ortalyq Azııadaǵy genderlik teńdik pen ornyqty damýdy qamtamasyz etý baǵytynda uzaq merzimdi sheshimder ázirleýge múmkindik beretinine senim bildirdi.
Prezıdent Senat tóraǵasynyń sapary ekijaqty yntymaqtastyqtyń erekshe sıpatynyń jarqyn kórinisi ekenin jáne Qazaqstan men Ózbekstan arasyndaǵy strategııalyq seriktestik pen odaqtastyq deńgeıine saı keletinin atap ótti.
«Byltyr jeltoqsan aıynda Ózbekstanǵa jasaǵan memlekettik saparymnyń nátıjesin joǵary baǵalaımyz. Bıyl 3 naýryzda Shymkentte ótken beıresmı kezdesý barysynda elderimiz arasyndaǵy ózara is-árekettiń ózekti máseleleri talqylandy. Tek úkimet deńgeıinde ǵana júıeli jumys júrgizilip jatqan joq, parlamentaralyq dıplomatııa da belsendi damyp kele jatyr. Bul – qýantarlyq jaıt. Sondyqtan kelesi jyly ekinshi Parlamentaralyq forýmnyń Samarqand qalasynda ótkizilýin quptaımyn», – dedi Qasym-Jomart Toqaev.
Óz kezeginde Tanzıla Narbaeva qurmet kórsetkeni úshin alǵys aıtyp, Ózbekstan Prezıdenti Shavkat Mırzıeevtiń sálemin jetkizdi.
«Sizdiń basshylyǵyńyzben Qazaqstanda júzege asyrylyp jatqan keń aýqymdy reformalardy joǵary baǵalaımyz. Sizdi Qazaqstannyń búkil júıesiniń saıası jańǵyrýyna yqpal etken aýqymdy is-sharalardyń tabysty júzege asyrylýymen quttyqtaǵym keledi. Elińiz týra jolmen keledi jáne halyq iske asyrylyp jatqan reformalaryńyzdy belsendi qoldaıdy. Biz buǵan qýanyshtymyz», – dedi Senat tóraǵasy.
Kezdesý sońynda Memleket basshysy Ózbekstan Prezıdentine júrekjardy sálemin joldady.
