Prezıdent Ózbekstan prezıdenti Ákimshiliginiń basshysy Saıda Mırzıeevany qabyldady
ASTANA. KAZINFORM — Qasym-Jomart Toqaev Saıda Mırzıeevanyń sapary Astana men Tashkenttiń strategııalyq seriktestigin ilgeriletý turǵysynan erekshe mánge ıe ekenin atap ótti. Bul týraly Aqordanyń baspasóz qyzmeti habarlady.
— Sizdiń saparyńyz Qazaqstan men Ózbekstan arasyndaǵy ortaq yntymaqtastyqty damytý úshin óte paıdaly bolady dep sanaımyz. Bizdiń saıası júıelerimizde prezıdent ákimshilikteri aıryqsha ról atqarady. Men ákimshilikter arasyndaǵy jumys qatynastarynyń jandanǵanyn árdaıym qoldaımyn. Bir-birimizben baılanystarymyz artqan saıyn Ortalyq Azııadaǵy turaqtylyq, óńirlik yqpaldastyq nyǵaıa túsedi. Óıtkeni Qazaqstan da, Ózbekstan da tutas kórsetkishter boıynsha iri memleketter sanalady. Elderimiz qazir damýdyń betburys kezeńinde tur. Bizge beıbitshilik pen qaýipsizdik qajet. Sonda ǵana reformalardy sátti iske asyra alamyz, — dedi Prezıdent.
Memleket basshysy 2026 jyl Qazaqstanda Tsıfrlandyrý jáne jasandy ıntellekt jyly dep jarııalanǵanyna toqtaldy.
— Men Buharaǵa jasaǵan jumys saparymdy rızashylyqpen eske alamyn. Biz Ózbekstannyń kóptegen salada, sonyń ishinde jasandy ıntellektini engizý men tsıfrlandyrý baǵytynda qol jetkizgen tabystarymen tanysýǵa múmkindik aldyq. Álem jasandy ıntellektini qarqyndy túrde damytýǵa bet burdy. Osy oraıda biz de qazirgi zaman aǵymyna ilese bilýimiz kerek, — dedi Qasym-Jomart Toqaev.
Memleket basshysy Ózbekstan Prezıdenti Shavkat Mırzıeevke jyly lebizin joldady.
Osyǵan deıin Qasym-Jomart Toqaev Brıýsselge resmı saparmen baratynyn jazǵan edik.
