Prezıdent Ózbekstan Olıı Májilisi Senatynyń tóraǵasy Tanzıla Narbaevany qabyldady
ASTANA. KAZINFORM – Kezdesý barysynda qazaq-ózbek strategııalyq seriktestigi men odaqtastyq qatynastarynyń ózekti máseleleri parlamentaralyq baılanystardy damytý turǵysynan talqylandy, dep habarlaıdy Aqordanyń baspasóz qyzmeti.
Prezıdent Qasym-Jomart Toqaev Tanzıla Narbaevaǵa iltıpat bildirip, onyń Astanaǵa sapary Qazaqstan men Ózbekstan arasyndaǵy strategııalyq yntymaqtastyqtyń aıryqsha sıpatta órbip kele jatqanyn rastaıtynyn atap ótti.
Memleket basshysy qos halyq arasyndaǵy dostyq, tatý kórshilik baılanystardy nyǵaıtýǵa Ózbekstan Olıı Májilisi Senaty tóraǵasynyń qosqan úlesin joǵary baǵalady.
– Sizdiń saparyńyz elderimizdiń arasyndaǵy dostyq qatynastardy nyǵaıtý turǵysynan óte mańyzdy. Biz baýyrlas Ózbek elimen yntymaqtastyǵymyzdy damytýǵa erekshe mán beremiz. Muny Ortalyq Azııa óńirindegi turaqtylyq pen qaýipsizdikti saqtaýda óte mańyzdy faktor dep sanaımyz. Eki eldiń yqpaldastyǵy neǵurlym tyǵyz ári tabysty órbigen saıyn, jalpy óńirdegi jaǵdaı da tynysh bolady. Sizdiń saparyńyz parlamentaralyq baılanysty keńeıtý úshin shyn máninde mańyzdy ról atqarady, – dedi Memleket basshysy.
Prezıdent ekijaqty strategııalyq seriktestikti tereńdetýge sińirgen eńbegi úshin Tanzıla Narbaevany II dárejeli «Dostyq» ordenimen marapattady.
Osyǵan deıin Memleket basshysy Qostanaı oblysynyń ákimi Qumar Aqsaqalovty qabyldaǵan bolatyn.