Prezıdent óz málimdemesinde eldegi máselelerdi sheshý joldaryn óte durys aıtty - Ermek Kelemseıit
ALMATY. QazAqparat – «Ardagerler uıymy» respýblıkalyq qoǵamdyq birlestiginiń Almaty oblystyq fılıalynyń tóraǵasy, oblystyq qoǵamdyq keńestiń múshesi Ermek Kelemseıit Memleket basshysynyń Parlament Májilisiniń otyrysynda sóılegen sózine qatysty pikirin aıtty, dep habarlaıdy QazAqparat tilshisi.
«Memleket basshysy Qasym-Jomart Toqaevtyń Parlament Májilisinde aıtqan sózderinen onyń eldegi ózekti máselelerge óte qanyq ekenin kórdik. Olaı bolýy zańdy da, sebebi, el Prezıdenti bolǵan soń, oǵan búkil elimiz úmit jáne senimmen qarap otyr»,- dep atap ótti Ermek Kelemseıit.
Onyń aıtýynsha, Prezıdent jastardyń sapaly bilim alýyna qoljetimdilikti arttyrý týraly aıtqan málimdemesi óte mańyzdy.
«Qasym-Jomart Toqaev Qazaqstanda sheteldik JOO-lardyń ashylyp jatqanyn aıtty jáne 2025 jylǵa qaraı sheteldik bedeldi ýnıversıtetterdiń kem degende bes fılıalyn ashý qajettigi týraly bastamasy óte oryndy. Sebebi, bizdiń jerimiz hımııalyq elementterge baı. Batystan munaı, gaz shyǵady. Elimizde osy salany jetildirip, tolyq ıgerý úshin bizge bilimdi de bilikti jastar, mamandar kerek. Al Prezıdent aıtqan sheteldik bedeldi ýnıversıtet fılıaldaryn elimizde ashyp, onda óz jastarymyz túsirip, oqytsaq, elimizde ǵylym da damıdy, myqty kadrlar da daıyn bolady degen sóz. Sondyqtan Prezıdenttiń bul bastamasy ábden oılastyrylyp, durys aıtylǵan sóz dep oılaımyn»,-dedi spıker.
Sondaı-aq ol Prezıdenttiń «el azamattarynyń ál-aýqaty men áleýmettik kóńil-kúıi memlekettiń basty jáne únemi nazarynda bolýy kerek» degen sózin qoldaıtynyn bildirdi.
«Prezıdent óz málimdemesinde eldegi máselelerdi sheshý joldaryn jaqsy jetkizdi. Eger ol aıtqan máselelerdiń sheshý joldary durys atqarylsa, sol máseleler túbegeıli sheshiletin bolady dep sanaımyn», - dedi Ermek Kelemseıit.
Foto: ognialatau.kz
