Prezıdent óz maqalasynda rýhanııatty qoǵamnyń strategııalyq resýrsy retinde belgiledi - Bashmakov
ASTANA. QazAqparat - Prezıdent óz maqalasynda rýhanııatty qoǵamnyń strategııalyq resýrsy retinde belgiledi.
Mundaı pikirdi Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasyna oraı L.Gýmılev atyndaǵy Eýrazııa ulttyq ýnıversıteti Qazaqstan halqy Assambleıasy kafedrasynyń meńgerýshisi Anatolıı Bashmakov bildirdi, dep habarlaıdy QazAqparat.
«Memleket basshysynyń qoǵamdyq sanany jańǵyrtý arqyly elimizdiń bolashaǵy jaıyndaǵy tolǵanysy túrli qujattarda, onyń ishinde taıaýdaǵy Qazaqstan halqyna Joldaýynda aıqyndalǵan úshtik mindettiń bóligi dep sanaımyn. Onda Elbasy jaıly ekonomıkany jáne saıası ınstıtýttyq ortany qosa alǵandaǵy úshinshi jańǵyrý jaıynda aıtqan edi. Mine, aqyr sońynda atalǵan jańǵyrtýdyń úshinshi serpilisi ári mindeti qoǵamdyq sana boldy. Kez kelgen saladaǵy kez kelgen jańǵyrý eń aldymen, adamnyń sana-seziminiń, dúnıetanymynyń jańǵyrýymen bastalady dep bilemin. Jańǵyrý qajettiligin túsinbeı qandaı da bir jańǵyrýdyń oryn alýy múmkin emes. Menińshe, Prezıdenttiń maqalasy «Máńgilik el» gýmanıstik ıdeıasyn jalǵastyrady jáne bul rette, rýhanııatqa bul qazaqstandyq qoǵamnyń strategııalyq resýrsy retinde anyqtama beriledi», - dedi Anatolıı Bashmakov.
Onyń atap ótýinshe, Memleket basshysynyń maqalasynda bilim berý, onyń ishinde «mektep-JOO» qurylymynyń rólin arttyrý jaıy da qozǵalǵan. ıAǵnı, tarıh, ulttyq salt-dástúr men ádet-ǵurypqa qurmet kórsetý arqyly ónegeli adam tárbıeleý qajettigi basa kórsetilgen. Mektepte jáne joǵary oqý ornynda bilim alý - bul ult qalyptastyrýshy protsess. Prezıdent júktep otyrǵan qazaqstandyq biregeılik, bolashaqtyń birtutas ultyn qalyptastyrý tapsyrmasy bilim berý protsesi arqyly sheshiledi.
A.Bashmakovtyń aıtýynsha, Memleket basshysynyń maqalasynda 1995 jyly qurylǵan Qazaqstan halqy Assambleıasynyń róline de basa mán berilgen. Assambleıa 22 jyldyń ishinde óz qyzmetimen qazaqstandyq biregeılikti qalyptastyrýdaǵy rýhanı mektep ekendigin dáleldep berdi.
Onyń paıymynsha, Prezıdent maqalasy elimizdiń barlyq óńirinde zerdelenip, talqylanýy tıis. Sonymen qatar bedeldi qazaqstandyqtardan, naǵyz otanshyldardan jasaqtalǵan úgit-nasıhat tobyn qurǵan jón.
