Prezıdent: Otbasynda oıran salatyndarǵa jazany kúsheıtetin kez keldi

NUR-SULTAN. QazAqparat - Otbasynda oıran salatyndarǵa jazany kúsheıtetin kez keldi. Bul jaıynda QR Prezıdenti Qasym-Jomart Toqaev Qazaqstan halqyna Joldaýynda aıtty, dep habarlaıdy QazAqparat tilshisi.

«Otbasylyq zorlyq-zombylyqty qylmys sanatyna jatqyzý máselesi qoǵamda kópten beri talqylanyp júr. Quqyq qorǵaý organdary bul usynystyń durys ekenine kúmánmen qaraıdy. Sebebi, mundaı turmystyq jaǵdaılardy anyqtaý ońaı emes, ıaǵnı osyndaı oqıǵalardy tergep-tekserý qıynǵa soǵady. Bul sózdiń de jany bar. Biraq qalaı desek te, otbasylyq zorlyq-zombylyqqa kóz juma qaraýǵa bolmaıdy. Otbasynda oıran salatyndar jazaǵa tartylmasa, olar odan beter basynyp ketedi. Al japa shekkender múldem qorǵaýsyz qalady. Mundaı áreketter úshin jazany kúsheıtetin kez keldi dep sanaımyn. Zardap shekken jandar eldiń sózinen nemese bireýdiń qysym jasaýynan qoryqpaýy qajet», - dep atap ótti QR Prezıdenti.

Memleket basshysynyń aıtýynsha, sondyqtan polıtsııa qyzmetkerleri olarmen óte muqııat jumys júrgizip, tıisti sharalardy qoldanýy kerek.