Prezıdent otanshyldyqtyń basty ólshemin atady
ASTANA. KAZINFORM — Shynaıy otanshyldyq adamdarǵa qamqorlyqtan kórinedi, keıingi urpaqqa ne qaldyramyz degen salmaqty saýalmen ólshenedi. Bul týraly Aýyl sharýashylyǵy eńbekkerleriniń ІІІ forýmynda Memleket basshysy Qasym-Jomart Toqaev aıtty.
— «Halyqtyq qurylys» baǵdarlamasy, jemqorlyqpen jappaı kúres, memlekettik basqarý júıesindegi reforma, qoǵamda jańa jasampaz qundylyqtardy ornyqtyrý — munyń bári úlken joldyń basy ǵana. Aldymyzda áli kóptegen is pen bıik belester kútip tur. Osyǵan deıin aıtqanymdaı, el damýyna qatysty orta jáne uzaqmerzimdi perspektıvaǵa arnalǵan oılarym men josparym bar, — dedi Prezıdent.
Qasym-Jomart Toqaev memleketimizdiń Egemendigin, Táýelsizdigin qorǵaýǵa qatysty keıbir másele túbegeıli sheshimin tappaǵanyn taǵy da basa aıtty.
— Men ol jóninde halyqqa arnaǵan Joldaýymda aıtqanmyn. Toqmeıilsip, beıqam júrýdiń jóni joq. Muny jaqsy túsinýimiz kerek. Meniń oıymsha, Memleket basshysynyń mindeti — júıeli áreket etý, dittegen maqsattan aınymaý, el taǵdyryndaǵy mańyzdy sheshimder úshin jaýapkershilik arqalaý. Elimizdegi ózgeristerdiń qarqyn alǵany qýantady. Ol endi toqtamaıdy. Sondyqtan halyqtyń ál-aýqaty men ulttyq múddeni qara basynyń qamynan joǵary qoıatyn naǵyz memleketshil tulǵalar qajet. Shynaıy otanshyldyq adamdarǵa qamqorlyqtan kórinedi, keıingi urpaqqa ne qaldyramyz degen salmaqty saýalmen ólshenedi, — dedi Memleket basshysy.
Prezıdenttiń paıymynsha, baq-dáýlet keledi de ketedi, al sońyńda jasaǵan isiń men jaqsy atyń qalady. Sonyń biri — erteń adamdar, keler urpaq ıgiligin kóretin áleýmettik ınfraqurylymdar.
— Qoǵamda zań ústemdigi saltanat qurýy úshin senimdi tirek kerek, ıaǵnı, adamdardyń ózegi myqty, moraldyq prıntsıpteri myqty bolǵany jón. Dál osy sebepti jańa qoǵamdyq etıka qalyptastyrý jáne «Taza Qazaqstan» tujyrymyn dáripteý óte mańyzdy. Óıtkeni tek aınalamyzdan ǵana emes, azamattarymyzdyń nıet-pıǵylynan, sózinen jáne is-áreketinen tazalyq sezilip turýǵa tıis, — dedi Qasym-Jomart Toqaev.