Prezıdent otandyq geologııa salasynyń ardagerlerin qabyldady
Qasym-Jomart Toqaev elimizdiń geologııa salasyna eńbek sińirgen bir top qaıratkermen – QR UǴA akademıgi Serikbek Dáýkeevpen, «Merıdıan Petroleým» JShS dırektory Baltabek Qýandyqovpen, Q.I. Sátbaev atyndaǵy Geologııalyq ǵylymdar ınstıtýtynyń dırektory Geroı Joltaevpen jáne «Mıneraldyq resýrstar akademııasy» qoǵamdyq birlestiginiń prezıdenti Bolat Újkenovpen kezdesti, dep habarlaıdy Kazinform Aqordanyń baspasóz qyzmetine siltememen.
Kezdesý barysynda Memleket basshysy geologııa salasy jalpy jer qoınaýyn paıdalaný isin qarqyndy damytýdyń negizi ekenin jáne el ekonomıkasynyń mańyzdy quramdas bólshegi sanalatynyn atap ótti.
Prezıdenttiń pikirinshe, atalǵan salaǵa, ásirese geologııalyq barlaý jáne jer qoınaýyn keshendi zertteý baǵytyna tyń serpin berý qajet. Sondyqtan jýyrdaǵy Joldaýda Úkimetke 2026 jylǵa qaraı geologııalyq jáne geofızıkalyq barlaý kólemin 2,2 mıllıon sharshy shaqyrymǵa deıin jetkizý mindeti júkteldi.
Memleket basshysynyń aıtýynsha, geologııalyq barlaý salasyna sheteldik ınvestorlardy, sondaı-aq kapıtal men zamanaýı tehnologııalardy tartý maqsatynda keshendi sharalar qabyldanyp jatyr. Bul rette ınvestıtsııa úshin geologııa salasynyń ashyqtyǵy men memleket múddesi arasyndaǵy teńgerimdi saqtaý mańyzdy.
Sonymen qatar kezdesýde geologııa salasynyń ózekti máseleleri men atalǵan baǵytty yntalandyrýǵa qatysty usynystar talqylandy.
Kezdesý sońynda Qasym-Jomart Toqaev otandyq geologııa salasyn damytýǵa eleýli úles qosqany úshin ardager ǵalymdarǵa alǵys aıtty.
