Prezıdent otandyq farmatsevtıka ónerkásibin órkendetý boıynsha birqatar tapsyrma berdi
ASTANA. KAZINFORM — Memleket basshysy Densaýlyq saqtaý mınıstri Aqmaral Álnazarovany qabyldady. Bul týraly Aqorda málim etti.
Prezıdentke densaýlyq saqtaý júıesiniń qazirgi jaı-kúıi men salany damytý perspektıvasy jóninde esep berildi.
— Qasym-Jomart Toqaevqa negizgi medıtsınalyq-demografııalyq kórsetkishter týraly baıandaldy. Mınıstr jalpy jáne náresteler ólimi 15,3 paıyzǵa tómendegenin aıtty. Qazaqstanda juqpaly emes aýrýlardan merziminen buryn qaıtys bolǵandar sany 25 paıyzǵa azaıdy. Osylaısha, Dúnıejúzilik densaýlyq saqtaý uıymynyń maqsatty kórsetkishine qol jetkizildi, — delingen habarlamada.
Memleket basshysyna medıtsınalyq kómektiń qoljetimdiligin arttyrý, alǵashqy medıtsınalyq járdemdi jetildirý, skrınıng baǵdarlamalarynyń aıasyn keńeıtý jáne ana men bala densaýlyǵyn qorǵaý qyzmetin jańǵyrtý jóninde aıtyldy.
— Onkologııalyq qyzmetti damytý sharalary jalǵasyp keledi. Astana qalasyndaǵy jańa onkologııalyq keshenniń bazasynda Protondy terapııa ortalyǵy ashyldy. Qyzylorda jáne Aqtaý qalalarynda 2 jańa PET/KT kesheni iske qosyldy. Barlyq óńirde sarapshylyq endoskopııa ortalyqtarynyń jumysy jolǵa qoıyldy, — dep habarlady Aqordadan.
Ulttyq ǵylymı onkologııa ortalyǵy men aımaqtardaǵy birqatar nysan qurylysy aıaqtaldy.
Budan bólek, MÁMS júıesindegi qarjyny baqylaýdy kúsheıtý, sonyń ishinde qarajatty maqsatty jumsaýdy monıtorıngteý júıesin avtomattandyrý jáne medıtsınalyq qyzmet kórsetýshilerge talapty qatańdatý sharalaryna basa nazar aýdaryldy.
Mınıstrlik Memleket basshysynyń tapsyrmasyn oryndaý maqsatynda Densaýlyq saqtaýdyń biryńǵaı tsıfrlyq ınfraqurylymyn qalyptastyrý boıynsha jumys júrgizip jatyr. Jeke-jeke qyzmet kórsetetin aqparat júıelerin E-Densaulyq platformasyna biriktirý qolǵa alynǵan.
Mınıstr sońǵy eki jylda farmatsevtıka ónerkásibine salynǵan ınvestıtsııa kólemi 2,3 ese, al dári-dármektiń eksporty 1,9 ese óskenin baıandady. Dári-dármektiń 400-den astam túrin óndirý boıynsha 6 ınvestıtsııalyq kelisim jasaldy. Olardyń jalpy quny 316,3 mıllıard teńgege baǵalanǵan.
Sondaı-aq Qasym-Jomart Toqaevqa salanyń kadrlyq áleýetin damytý, medıtsına qyzmetkerlerine áleýmettik qoldaý kórsetý jóninde aqparat usynyldy.
Prezıdent medıtsınalyq qyzmet sapasyn arttyrý, saladaǵy qarjylyq tártipti qatańdatý, maman daıarlaý júıesin jetildirý, tsıfrlyq jańǵyrtý jumystaryn jedeldetý jáne otandyq farmatsevtıka ónerkásibin órkendetý boıynsha birqatar tapsyrma berdi.
Eske sala keteıik, buǵan deıin Prezıdent Halyqaralyq áıelder kúni merekesimen quttyqtady.
