Prezıdent Óskemendegi Ústel tennısi ortalyǵyn aralap, balalarǵa avtobýs syılady
ÓSKEMEN. KAZINFORM — Prezıdent Óskemendegi Ústel tennısi ortalyǵyn aralap kórdi.
Prezıdentke berilgen málimetke sáıkes, ortalyq ústel tennısi boıynsha oblystaǵy balalar men jasóspirimderge arnalǵan olımpıadalyq rezerv sport mektebiniń bazasynda qurylǵan.
Munda iri jarystar, buqaralyq sport sharalary men oqý-jattyǵý jıyndary ótkiziledi.
Sondaı-aq ınvaklýb sportshylary, «Úmit» balalar úıiniń tárbıelenýshileri úshin kásibı dárister, shoýdaýn (kózi nashar kóretinderge arnalǵan ústel tennısi) uıymdastyrylady.
Ǵımarat kásibı tennıs ústelderimen jáne basqa da sport quraldarymen jabdyqtalǵan.
Ortalyqta sportshylardyń jarystardan keıin jáne jaraqat alǵan kezde fızıoterapııa em-sharalaryn alyp, qaıta qalypqa kelýi úshin arnaıy qurylǵylarmen jabdyqtalǵan dárigerlik-deneshynyqtyrý dıspanseri bar.
Qasym-Jomart Toqaevqa sporttyń osy túri boıynsha óńirdiń jetistikteri týraly málimet berildi.
Mysaly, ótken jyly oblys komandasy Qazaqstannyń ashyq chempıonatynda jeńimpaz atanǵan.
Prezıdentke tájirıbe almasyp, sporttyq sheberligin shyńdaý úshin Ústel tennısi akademııasyn qurý josparlanyp otyrǵany jóninde baıandaldy.
Memleket basshysy sport arenalaryn aralap kórip, «Úmit» balalar úıiniń tárbıelenýshilerimen sóılesti.
Prezıdent oblys ákimine atalǵan mekemeniń jaǵdaıyn erekshe baqylaýda ustaýdy jáne tárbıelenýshilerdi turǵyn úımen qamtamasyz etýdi tapsyrdy.
– Sizdermen júzdeskenime qýanyshtymyn. Al ortalyqqa keler bolsaq, ol, shyn máninde, júıeli jumys istep jatyr. Jalpy, ústel tennısimen shuǵyldaný adamı qasıetter men sporttyq daǵdylardy damytý turǵysynan paıdaly, – dedi Memleket basshysy.
Qasym-Jomart Toqaev Ústel tennısi ortalyǵyna avtobýs syılap, jas sportshylarǵa tabys tiledi.
