Prezıdent Óskemen tıtan-magnıı kombınatyna bardy
ASTANA. KAZINFORM - Memleket basshysy «Óskemen tıtan-magnıı kombınaty» aktsıonerlik qoǵamyndaǵy óndiris jumystarynyń jaı-kúıimen jáne kásiporynnyń damý perspektıvasymen tanysty, dep habarlaıdy Aqordanyń baspasóz qyzmeti.
Kombınat shıkizat óndirýden bastap odan daıyn ónim alýǵa deıingi óndiristiń búkil tsıklyn qamtıtyn keýekti tıtan, tıtan quımalary men qorytpalaryn shyǵaratyn álemdegi birtutas kásiporyndardyń biri sanalady. Óndiris qurylymy 5 negizgi jáne 6 qosalqy tsehtan, sondaı-aq enshiles ári birlesken kásiporyndardan turady. Álemdegi tıtan naryǵynyń 11 paıyzy Qazaqstanǵa tıesili, al aeroǵarysh salasyndaǵy tıtannyń 20 paıyzdan astamyn bizdiń el qamtamasyz etedi.
Memleket basshysyna kombınat ónimin Airbus, Boeing, TIMET, ATI, Safran, UKAD, Pratt&Whitney, General Electric, Dynamet, Howmet, POSCO, Baoti, MIDHANI sekildi álemdik iri kompanııalar sertıfıkattaǵany týraly baıandaldy. Qazaqstan tıtany keme jasaý isinde, energetıka, aeroǵarysh salalarynda, munaı-gaz kásipornynda jáne medıtsınada keńinen paıdalanylady. Ónim AQSh-qa, Ulybrıtanııaǵa, Frantsııaǵa, Ońtústik Koreıaǵa, Úndistanǵa jáne Qytaıǵa eksporttalady.
Aldaǵy on jylda kombınat jalpy somasy 207 mıllıard teńge bolatyn 25 ınvestıtsııalyq jobany júzege asyrýdy josparlap otyr.
Qasym-Jomart Toqaev óndiris tsehtaryn aralap kórip, kombınat jumysshylarymen áńgimelesti.
– Bul kombınat kóptegen ólshem boıynsha ozyq mekeme sanalady. Zamanaýı quraldarmen jabdyqtalǵan. Qazaqstan tıtan óndirisi boıynsha álemdik naryqta jetekshi oryn alady. Elimiz úshin mundaı kásiporyndar óte qajet. Jumystaryńyz tabysty bolsyn, – dedi Prezıdent.