Prezıdent Ortalyq Azııaǵa ortaq habar taratatyn telearna qurýdy usyndy

NUR-SULTAN. QazAqparat – Memleket basshysy Qasym-Jomart Toqaev Ortalyq Azııaǵa ortaq habar taratatyn telearna nemese saıt qurýdy usyndy, dep habarlaıdy QazAqparat tilshisi.

«Aqparat keńistiginde búkil óńirge zııan tóndiretin jaǵymsyz qubylystardyń aldyn alý jolynda kúsh biriktirgenimiz durys bolar edi. Bul jumystyń negizgi máni dostyǵymyzdyń tutastyǵyn saqtaý bolýǵa tıis.

Bizge etnosaralyq jáne memleketaralyq alaýyzdyqty órshitý arqyly qarym-qatynasymyzǵa syna qaǵýǵa, halyqtardy bóleksheýge baǵyttalǵan áreketterdiń bárine birlesip qarsy turý kerek», - dedi Qasym-Jomart Toqaev.

Memleket basshysy bul problemany sheshýdiń jolyn da atady.

«Ókinishke qaraı, buqaralyq aqparat quraldarymyzda aımaq elderiniń tynys-tirshiligin kórsetetin aqparattar áli kúnge deıin tapshy.

Bul tendentsııany buzsa durys bolady. Bálkim jalpyóńirlik telearna nemese jańalyq taratatyn ınternet-saıt qurý kerek shyǵar», - dedi Qazaqstan Prezıdenti.

Aıta keteıik, Qyrǵyz Respýblıkasynyń Sholpan-Ata qalasynda Ortalyq Azııa memleketteri basshylarynyń IV Konsýltatıvtik kezdesýi ótip jatyr.

Jıynǵa Qazaqstan, Qyrǵyzstan, Tájikstan, Túrikmenstan, Ózbekstan kóshbasshylary qatysýda.

Buǵan deıin Qazaqstan Prezıdenti Qasym-Jomart Toqaevtyń Qyrǵyzstannyń Sholpan-Ata qalasyna barǵanyn jazǵan bolatynbyz.