Jastarymyz eki, tipti úsh-tórt tildi ońaı meńgere alady - Prezıdent
ASTANA. KAZINFORM – Prezıdent ekinshi «Ortalyq Azııa – Reseı» sammıtinde Reseı men Ortalyq Azııa elderi san qyrly mádenı-gýmanıtarlyq baılanystardy damytýǵa basa nazar aýdarýy qajet dep sanaıtynyn jetkizdi. Bul týraly Aqordanyń baspasóz qyzmeti habarlady.
– Bul oraıda elderimizdi biriktiretin, jalpy ortaq qundylyǵymyz sanalatyn orys tiliniń orny erekshe. Birlesken kúsh-jigerdiń arqasynda Halyqaralyq orys tili uıymyn qurǵanymyz qýantady. Onyń shtab-páteri Sochı qalasynda ornalasqan. El aldynda sóılegen sózderimde qazaq jastarynyń orys tilin jetik meńgergeni mańyzdy ekenin aıtyp júrmin. Biraq bul talap qazaq tiliniń memlekettik mártebesin odan ári nyǵaıtýǵa baǵyttalǵan júıeli jumystarǵa kedergi keltirmeıdi. Qudaı bergen ana tilderimiz konstıtýtsııalyq tártippen memlekettik mártebege ıe boldy. Sondyqtan qazaq tiline burynǵydaı kóńil bóline beredi. Jastarymyz bıliktiń qoldaýymen eki, tipti úsh-tórt tildi ońaı meńgere alatynyna senimdimin. Mundaı mysaldar álemde az emes. Anyǵyn aıtqanda, Qazaqstandaǵy jaǵdaı osyndaı. Elimizdiń ár azamaty ózine yńǵaıly tilde sóıleýge quqyly. Bul – «Birligimiz – áralýandyqta» dep atalatyn ulttyq saıasatymyzdyń ózegi, – dedi Memleket basshysy.
Memleket basshysy «Ortalyq Azııa – Reseı» formatyndaǵy alǵashqy rektorlar forýmyn Qazaqstanda ótkizýdi usyndy. Osy oraıda, joǵary bilim salasyndaǵy baılanysty damytýdyń máni erekshe arta tústi. Búginde Qazaqstannyń 60 ýnıversıteti Reseıdiń 50 joǵary oqý ornymen yntymaqtastyq ornatqan. Reseıde 60 myńnan asa qazaqstandyq stýdent oqıdy.
– Elimizde Reseıdiń jetekshi oqý oryndarynyń 9 fılıaly jumys isteıdi. Olardyń qatarynda bıyl paıdalanýǵa berilgen Máskeý memlekettik halyqaralyq qatynastar ınstıtýtynyń fılıaly da bar. Byltyr Qazaqstanda Tashkent ırrıgatsııa jáne aýyl sharýashylyǵyn mehanıkalandyrý ınjenerleri ınstıtýtynyń fılıaly óz jumysyn bastady. Óz kezeginde Bishkek, Osh, Tashkent qalalarynda qazaqstandyq joǵary oqý oryndarynyń fılıaldary stýdentter qabyldady. Omby memlekettik ýnıversıteti bazasynda ál-Farabı atyndaǵy Qazaq ulttyq ýnıversıteti fılıalynyń ashylýy mańyzdy oqıǵaǵa aınaldy. Bul – Reseıdegi alǵashqy sheteldik oqý ornynyń ókildigi. Osy salada syndarly qarym-qatynas ornatqany úshin áriptesterime rızashylyq bildiremin. Elderimiz arasynda ǵylym-bilim salasy boıynsha tyǵyz baılanys ornaǵanyn eskerip, «Ortalyq Azııa – Reseı» formatyndaǵy alǵashqy rektorlar forýmyn Qazaqstanda ótkizýdi usynamyn. Qazirgi jaǵdaı yqpaldastyqty tsıfrlyq formatta belsendi damytý qajet ekenin kórsetip otyr. Osy oraıda «Ortalyq Azııa – Reseı» tsıfrlyq kitaphanasy» birlesken bilim berý onlaın-platformasyn ashýǵa múmkindik mol dep oılaımyn. Munda ýnıversıtetterimizdiń kýrstary men dáristeri, arhıvteri qoljetimdi bolýǵa tıis, – dedi Qasym-Jomart Toqaev.
Prezıdent Qazaqstan Reseı munaıyn Qytaıǵa tasymaldaýda mańyzdy ról atqaratynyn aıtty.