Prezıdent Ortalyq Azııa men Koreıa jastaryna arnalǵan jańa baǵdarlama qabyldaýdy usyndy
ASTANA. KAZINFORM – Memleket basshysy Qasym-Jomart Toqaev Ortalyq Azııa men Koreıa arasyndaǵy mádenı-gýmanıtarlyq yntymaqtastyqty odan ári nyǵaıtyp, jastarǵa arnalǵan Central Asia – Korea Future Generation baǵdarlamasyn qabyldaýdy usyndy, dep habarlaıdy Aqorda.
Prezıdent sammıtke qatysýshy memleketterdiń mádenı-gýmanıtarlyq yntymaqtastyqty nyǵaıtýda aıtarlyqtaı tabysqa jetkenine nazar aýdardy.
Qasym-Jomart Toqaev Ortalyq Azııa elderi men Koreıa arasyndaǵy tarıhı baılanystarda kore-saram qaýymynyń aıryqsha ról atqaratynyn atap ótti.
– Elderimizdiń arasynda tarıhtan tamyr tartatyn baýyrlastyq baılanystar qalyptasqan. Bul rette óńirdegi memleketter halqymen bite qaınasyp ketken kore-saram qaýymy aıryqsha ról atqarady. Koreı dıasporasy Ortalyq Azııa men Koreıa arasyndaǵy dostyqqa dáneker bolyp otyr. Qazaqstan elimizde pana taýyp, ósip-óngen koreı halqynyń salt-dástúri men mádenıetin saqtaýyna erekshe qamqorlyq kórsetti, – dedi Memleket basshysy.
Prezıdent kelesi jyly koreılerdiń Ortalyq Azııaǵa jer aýdarylǵanyna 90 jyl tolatynyn aıtyp, osy tarıhı oqıǵaǵa arnalǵan arnaıy is-shara uıymdastyrýdy usyndy.
Sonymen qatar Memleket basshysy jastardyń ózara baılanysyn kúsheıtýge, bilim jáne mádenıet salalaryndaǵy yqpaldastyq múmkindikterin keńeıtýge arnalǵan Central Asia – Korea Future Generation baǵdarlamasyn qabyldaý qajet dep sanaıtynyn jetkizdi.
Sammıtte Koreıa Respýblıkasynyń Prezıdenti Lı Chje Meń, Qyrǵyzstan Prezıdenti Sadyr Japarov, Tájikstan Prezıdenti Emomalı Rahmon, Túrikmenstan Prezıdenti Serdar Berdimuhamedov jáne Ózbekstan Prezıdenti Shavkat Mırzıeev sóz sóıledi.
Aıta keteıik, qazaq-koreı kelisimderi energetıka, ǵylym, jumyspen qamtý jáne týrızm salasyn qamtydy.
