Prezıdent Ortalyq Azııa men Italııa bıznesmenderine arnalǵan dıalog alańyn qosýdy usyndy

ASTANA. KAZINFORM — Almatyda ıtalıandyq saýda úıin ashý kerek. Bul týraly elordada «Ortalyq Azııa — Italııa» sammıtinde Qazaqstan Prezıdenti Qasym-Jomart Toqaev málim etti. 

— Saýda úıleri men logıstıkalyq ortalyqtardyń ashylýy elderimiz arasyndaǵy taýar aınalymynyń keńeıýine eleýli serpin bere alar edi. Osy oraıda Almatyda Italııa saýda úıin qurý usynylady, — dedi Qasym-Jomart Toqaev. 

Sonymen qatar Memleket basshysy búgingi sammıtke qatysyp otyrǵan elderdiń isker toptary arasyndaǵy yntymaqtastyqty jandandyrýǵa qatysty usynys aıtty. Bul rette, B5 (bıznesmender)+ Italııa dıalog platformasyn iske qosqan jón. 

— Mundaı formattaǵy alǵashqy kezdesýdi Qazaqstanda ótkizýge bolady, — dedi Prezıdent.

Budan buryn habarlanǵandaı, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen «Ortalyq Azııa — Italııa» alǵashqy sammıti ótip jatyr. 

Aıtýly is-sharaǵa qurmetti meımandardan Italııa Mınıstrler Keńesiniń tóraǵasy Djordja Melonı, Qyrǵyzstan prezıdenti Sadyr Japarov, Ózbekstan prezıdenti Shavkat Mırzıeev, Túrikmenstan prezıdenti Serdar Berdimuhamedov, Tájikstan prezıdenti Emomalı Rahmon qatysyp otyr.