Prezıdent «Ortalyq Azııa – Qytaı» formatyndaǵy elderdiń ishki ister mınıstrlerin qabyldady
ASTANA. KAZINFORM - Prezıdent Qasym-Jomart Toqaev «Ortalyq Azııa – Qytaı» formatyndaǵy salalyq vedomstvolardyń ekinshi kezdesýine qatysý úshin Astanaǵa kelgen Qytaı Halyq Respýblıkasynyń Qoǵamdyq qaýipsizdik mınıstri Van Sıaohýndy, Qyrǵyz Respýblıkasynyń Іshki ister mınıstri Ulan Nııazbekovti, Tájikstan Respýblıkasynyń Іshki ister mınıstri Ramazon Rahımzodany, Túrikmenstannyń Іshki ister mınıstri Muhammet Hydyrovty jáne Ózbekstan Respýblıkasynyń Іshki ister mınıstri Azız Tashpýlatovty qabyldady, dep habarlaıdy Aqordanyń baspasóz qyzmeti.
Kezdesý barysynda óńirlik qaýipsizdikti qamtamasyz etý, transulttyq qylmys pen esirtkiniń zańsyz aınalymyna qarsy is-qımyl, kıberqaýipsizdik, ekstremızmmen jáne basqa da qazirgi syn-qaterlermen kúres máseleleri talqylandy.
Memleket basshysy Ortalyq Azııa elderi men Qytaıdyń quqyq qorǵaý organdary arasyndaǵy yqpaldastyqty arttyrý óńirde turaqtylyqty jáne qaýipsizdikti saqtaýda mańyzdy ekenin atap ótti.
– Uıymdasqan transulttyq qylmys tamyr jaıyp, aıasyn keńeıte tústi. Kıberqylmys tabysy joǵary jahandyq ındýstrııaǵa aınaldy. Bul adamdardy mıllıardtaǵan dollar shyǵynǵa ushyratady. Tsıfrlyq júıeni qylmystyq toptar óz qyzmetterin úılestirýge, tabystaryn jylystatýǵa, eshbir memlekettiń shekarasyna qaramaıtyn shabýyl jasaýǵa jıi qoldanady. Mańyzdy kólik jáne saýda baǵyttary túıisetin Ortalyq Azııa aımaǵyna transulttyq qylmystyq jeliniń qyzyǵýshylyǵy joǵary. Osy oraıda, uıymdasqan transulttyq qylmysqa, esirtkiniń zańsyz aınalymyna jáne adam saýdasyna qarsy turý máselesi ózekti bolyp otyr. Kúsh-jiger biriktirý, aqparat almasý, ınstıtýtsıonaldyq yqpaldastyqty nyǵaıtý jáne zamanaýı tehnologııalardy engizý arqyly ǵana bul syn-qaterlerge qarsy tura alatynymyzǵa senimdimin. Qazaqstan qaýipsizdik salasyndaǵy óńirlik jáne halyqaralyq yntymaqtastyqty tereńdetýdi dáıekti túrde qoldaıdy. Biz azamattarymyzdy qorǵaý men elderimizdi ornyqty damytý baǵytyndaǵy ashyq dıalogqa, úzdik tájirıbelerdi almasýǵa jáne birlesip sheshim qabyldaýǵa daıynbyz, – dedi Qasym-Jomart Toqaev.
Aıta keteıik, osyǵan deıin Qasym-Jomart Toqaev birqatar memlekettiń basshysymen telefon arqyly sóılesti.
