Prezıdent Ortalyq Azııa – Qytaı aqparat quraldarynyń forýmyna quttyqtaý joldady
ASTANA. KAZINFORM — Elordada Prezıdenttik ortalyqta Ortalyq Azııa men Qytaı yntymaqtastyǵy jáne damýy forýmy, sondaı-aq ІІІ «Jibek joly» halyqaralyq kommýnıkatsııalyq konferentsııasy ótip jatyr, dep habarlaıdy Kazinform tilshisi.
Forým Qazaqstan Respýblıkasynyń Prezıdenti Qasym-Jomart Toqaevtyń quttyqtaýymen ashyldy. Quttyqtaý hatyn Prezıdent kómekshisi Arman Qyryqbaev oqyp berdi.
− Sizderdi Qytaı Halyq Respýblıkasynyń Tóraǵasy Sı Tszınpın myrzanyń Qazaqstanǵa saparyna jáne ekinshi «Ortalyq Azııa — Qytaı» sammıtine oraı ótip jatqan alqaly jıyndardyń bastalýymen quttyqtaımyn! Mundaı is-sharalar Qazaqstan men Ortalyq Azııa elderiniń Qytaımen gýmanıtarlyq dıalogyn ornyqtyryp, mádenı yqpaldastyǵyn arttyra túsedi. Tatýlyq, dostyq jáne jan-jaqty strategııalyq áriptestik qaǵıdattaryna negizdelgen qazaq-qytaı qarym-qatynastary jyl saıyn nyǵaıyp keledi. Bıylǵy jyl «Qazaqstandaǵy Qytaı týrızmi jyly» dep jarııalandy. Sonyń aıasynda ózara túsinistik pen yqpaldastyqty tereńdete túsýge arnalǵan aýqymdy jobalar uıymdastyrylady. Búgingi basqosýda elderimizdiń buqaralyq aqparat quraldarynyń baılanysyn odan ári jaqsartýǵa múmkindik beretin mańyzdy usynystar men salmaqty oı-pikirler aıtylady dep senemin. Barshańyzǵa zor densaýlyq, baq-bereke tileımin! Jumystaryńyz tabysty bolsyn! , − dep jazylǵan Prezıdent quttyqtaýynda.
Aıta keteıik, forým «Qytaı men Ortalyq Azııa arasyndaǵy yntymaqtastyqtyń jańa kezeńin qurý úshin BAQ-ty ıntegratsııalaý» taqyrybynda ótip jatyr.
Іs-sharany Qytaıdyń «Sınhýa» aqparat agenttigi jáne Qazaqstan Respýblıkasy Prezıdentiniń Teleradıokesheni birlesip uıymdastyrǵan. Forýmǵa 6 eldiń medıa salasynda jumys isteıtin shamamen 140 ókil qatysyp jatyr.
Kezdesýde óńirlik aqparat almasýdy keńeıtý joldary, birlesken jobalardy iske qosý jáne gýmanıtarlyq baılanystardy nyǵaıtý máseleleri talqylanbaq.
Aıta keteıik, 17 maýsym kúni elordadaǵy Táýelsizdik saraıynda «Ortalyq Azııa – Qytaı» ІІ sammıti ótti.
Sammıtte Astana deklaratsııasyna qol qoıyldy.
Odan bólek Qytaı Ortalyq Azııanyń 5 eline 1,5 mlrd ıýan qaıtarymsyz kómek usynbaq.
Kelesi sammıt endi eki jyldan keıin Beıjińde ótedi.