Prezıdent: Ortalyq Azııa elderiniń halqyna vızalyq rásimderdi jeńildetken durys
ACTANA. KAZINFORM – Biryńǵaı týrıstik marshrýt ázirleý, vıza rásimderin jeńildetý. Memleket basshysy Japonııamen týrızm salasyndaǵy yqpaldastyqtyń negizgi baǵyttaryn atady. Bul týraly Aqordanyń baspasóz qyzmeti habarlady.
Ortalyq Azııa elderiniń tarıhy men mádenı murasy baı, tabıǵaty ásem. Bul japon týrısterin qyzyqtyrary sózsiz. Qazaqstan Japonııamen týrızm salasyndaǵy yntymaqtastyqty keńeıtýge nıetti.
- Japonııalyq týrıster úshin Orta Azııanyń biryńǵaı týrıstik marshrýtyn ázirlegen jón dep esepteımin. Sondaı-aq Ortalyq Azııa elderiniń halqyna vızalyq rásimderdi jeńildetken durys. Bul japondyq týrısterdiń bir saparda birneshe eldi aralap shyǵýyna múmkindik beredi. Al bizdiń azamattarymyz Kúnshyǵys elimen etene tanysa alady. Japonııany Osaka qalasynda EKSPO 2025 kórmesin tabysty ótkizýimen taǵy da quttyqtaımyn. «Kórme taqyrybyn jan-jaqty kórsetý» nomınatsııasy boıynsha altyn júlde ıelengenderińizge qýanyshtymyz, - dedi Memleket basshysy.
Prezıdent Qazaqstan 2027 jyly dzıýdodan álem chempıonatyn ótkizý qurmetine ıe bolǵanyn aıtty.
- Biz sport salasyndaǵy yqpaldastyqty órkendetýge, eń áýeli japonnyń dzıýdo, sýmo jáne kendo sekildi dástúrli jekpe-jek óner túrlerin dáripteýge ázirmiz. Qazaqstan 2027 jyly dzıýdodan 2lem chempıonatyn ótkizý qurmetine ıe boldy. Burnaǵy kúni men qazaqtan shyqqan belgili sýmoshy Kımbozan Harýkımen (Ersin Baltaǵul) tanystym. Tyǵyz mádenı-gýmanıtarlyq baılanystarymyz aldaǵy ýaqytta da halyqtarymyz arasyndaǵy ózara túsinistik pen dostyqty nyǵaıtýǵa qyzmet ete beredi dep senemin, - dedi Prezıdent.
Sammıtte Japonııa Premer-mınıstri Sanae Takaıchı, Qyrǵyzstan Prezıdenti Sadyr Japarov, Tájikstan Prezıdenti Emomalı Rahmon, Túrikmenstan Prezıdenti Serdar Berdimuhamedov jáne Ózbekstan Prezıdenti Shavkat Mırzıeev sóz sóıledi.
Aıta keteıik, Prezıdent Qasym-Jomart Toqaev «Ortalyq Azııa – Japonııa» dıalogynyń birinshi sammıtinde sóz sóıledi.
Memleket basshysy búgingi tarıhı kezdesýdi uıymdastyrýǵa bastamashy bolǵany jáne qonaqjaılyq tanytqany úshin Japonııa Premer-mınıstri Sanae Takaıchıge alǵys aıtty.