Prezıdent Ortalyq Azııa elderin qorǵanys saıasatynda birlesip áreket etýge shaqyrdy
ASTANA. KAZINFORM — Qazaqstan shekaranyń tutastyǵyna qol suqpaý qajet degen ustanymynan aınymaıdy. Bul jóninde Prezıdent Qasym-Jomart Toqaev «Egemen Qazaqstan» gazetine jarııalaǵan maqalasynda aıtqan.
«Ortalyq Azııada ǵana emes, sonymen qatar irgeles jatqan aımaqtarda da beıbitshilik pen turaqtylyqty saqtaý – uzaq merzimge arnalǵan órkendeý men damýdyń mańyzdy alǵysharty. Qazaqstannyń syrtqy saıasatyndaǵy basym baǵyttyń biri – tepe-teńdikti saqtaýǵa umtylý. Biz árdaıym «Beıbitshilik bárinen qymbat» degen qaǵıdany ustanamyz. Qazaqstan álem qoǵamdastyǵynyń jaýapty múshesi retinde halyqaralyq quqyq qaǵıdattaryn qatań saqtaý, egemendikti qurmetteý jáne shekaranyń tutastyǵyna qol suqpaý qajet dep sanaıdy. Qazaqstannyń bul paıymymen kelisetin elder az emes dep senimmen aıta alamyn. Kóptegen eldiń ustanymdary bir-birine uqsaıdy. Onyń bári ádil ári boljaýǵa bolatyn álemdik tártip ornatýǵa negizdelgen. Bul ustanym qazirgi beımaza zamanda bolashaq týraly syndarly kózqaras qalyptastyrýǵa jol ashady», - dep jazady avtor.
Qasym-Jomart Toqaev bul óńirdiń mańynda kúrdeli áskerı-saıası ahýal saqtalyp turǵanyn eske salady.
«Ortalyq Azııanyń aınalasynda kúrdeli áskerı-saıası ahýal saqtalyp otyrǵan qazirgi jaǵdaıda qorǵanys saıasaty men qaýipsizdik salasynda birlese áreket jasaý qajettigi týyndaıdy. Óńirlik qaýipsizdik júıesin qurý, onyń ishinde Ortalyq Azııanyń qaýipsizdigine baılanysty syn-qaterler tizimin jáne onyń aldyn alý sharalaryn ázirleý máselesi óte ózekti. Ortalyq Azııada birtutas qaýipsizdik keńistigin qalyptastyrý, burynnan bar jáne jańadan paıda bolǵan qaýip-qaterlerge qarsy kúresýge qatysty negizgi túıtkilderdi sheshetin keshendi tásilder qarastyrý, olardyń aldyn alý jáne qaterler týyndasa qolǵa alynatyn sharalardy oılastyrý, sondaı-aq BUU-men jáne osy saladaǵy basqa da halyqaralyq, óńirlik uıymdarmen belsendi yqpaldastyq ornatý aımaqtaǵy memleketterdiń eń basty basymdyqtary sanalady», - deıdi Memleket basshysy.
