Prezıdent «Órleý» ortalyǵyn synǵa alyp, pedagogterdi attestatsııalaý talaptaryn jeńildetýdi tapsyrdy
ASTANA. KAZINFORM — Muǵalimderdiń attestatsııadan ótý talaptary qaıta qaralyp, artyq júkteme men qaǵazbastylyqty azaıtýǵa baǵyttalǵan ózgerister engiziledi. Memleket basshysy Qasym-Jomart Toqaev pedagogterdi attestatsııalaý júıesin ońtaılandyrý jóninde Úkimetke tapsyrma berdi.
— Ózderińizge málim, muǵalimderge kásibı qoldaý kórsetý úshin «Órleý» biliktilikti arttyrý ulttyq ortalyǵy quryldy. Biraq búginde bul uıymnyń jumysy mardymsyz deýge bolady. Máselen, maǵan ustazdardan attestatsııa erejesin qaıta qaraý týraly kóptegen ótinish kelip tústi. Muǵalimder artyq júktemeniń jáne qaǵazbastylyqtyń kóp ekenin aıtyp, shaǵymdanyp otyr, — dedi Prezıdent elordada respýblıkalyq Tamyz keńesinde.
Osyǵan oraı, Memleket basshysy pedagogterdi attestatsııadan ótkizý talaptaryn ońtaılandyrý, jetildirý jóninde naqty tapsyrma bergenin habarlady.
— Bul jerde baǵalaýdan múlde bas tartý nemese ony kúrdelendirý týraly sóz bolyp otyrǵan joq. Bilimdi ádil baǵalaý — bilim berý júıesiniń ózegi. Bizge meılinshe túsinikti ári ashyq júıe kerek. Bul — óte mańyzdy másele, ony qarastyrǵan kezde joǵary jaýapkershilik pen minsiz kásibılik tanytý qajet. Tıisti mınıstrlik bul máselemen aınalysyp, kóp uzamaı naqty usynystar berýge tıis, — deıdi Qasym-Jomart Toqaev.
Sonymen birge, Prezıdent biliktilikti kóterý baǵdarlamalaryna jańa Konstıtýtsııa qundylyqtaryn, sondaı-aq, «Zań men tártip», «Adal azamat», «Taza Qazaqstan» ıdeıalaryn engizýdi usynyp, muny qyzmettik mindet dep aıtýǵa bolatynyn jetkizdi.
Buǵan deıin Qasym-Jomart Toqaev elimizge taǵy bes myńnan astam muǵalim jetispeıtinin aıtqan edi.
Sondaı-aq Prezıdent elimizdegi mektep qurylysyn jandandyrýdy tapsyrdy.
