Prezıdent orkestriniń oryndaýshylary «Kórkem» etno-aspaptar tobyn qurdy

«Áý basta «Tomırıs», «Tumar», «Alqa» atanǵymyz keldi. Keıin top múshesi Aıjannyń usynysyn qup kórip, «Kórkem» degen atqa toqtadyq», - deıdi G.Bekishova. Kúıshi qyzdar kúni búginge deıin Prezıdent orkestriniń oryndaýshylary retinde Aqordada ótken resmı kezdesýlerde mártebeli meımandardy qarsy alyp, olardy ulttyq ónerimizdiń káýsarymen sýsyndatqan. Ónerpazdar óz jumystaryn ár qaraı jalǵastyra bermekshi eken. Olardyń sózinshe, top músheleri óner jolynyń aýyr ekenin bir kisideı biledi. Sondyqtan talmaı, tanbaı eńbek ete bermek. «Tyńdarmandar synasa da, maqtasa da salqynqandylyq tanytamyz dep otyrmyz. Sebebi, synady eken dep synyp qalýǵa, maqtady eken dep kókirek kerýge bolmaıdy», - dedi A.Ábilbekova. Búginge deıin qyzdar birneshe kúı jazdyryp, túrli sahnalyq kıimder tiktiripti. Munyń jaı-japsaryn top múshesi A.Jumabaeva bylaı baıandady: «Dál qazir 3 túrli sahnalyq kıimimiz, «Aq ilme», «Shyǵys ánderiniń poppýrıi» jáne «Muńaıma» atty kúılerimiz bar. Taıaýda arnaıy fotosessııa jasadyq. Endi, beınebaıan túsirýdi josparlap otyrmyz. Ýaqyt óte kele top quramynda jeke ánshiniń paıda bolýy múmkin. Ol ánshi aramyzdan shyǵa ma, álde syrttan qosyla ma, ony dál qazir aıta almaımyz. Negizi, aramyzda án shyrqaı alatyn qyzdar bar». «Kórkem» etno-aspaptar tobynyń músheleri dombyra, qylqobyz prıma-qobyz jáne sazsyrnaı aspaptarynda oınaıdy. «Árqaısymyz ózimiz oınaıtyn ulttyq aspaptardy sheberlerge arnaıy tapsyrys berip jasattyq. Ony kózimizdi jumyp otyryp ta oınaı beremiz», - dedi Á.Beısen.