Prezıdent orynsyz shyǵyndy boldyrmaý úshin JI paıdalanýdy usyndy
ASTANA. KAZINFORM – Memleket basshysy Qasym-Jomart Toqaev bıýdjet qarajatyn josparlaý men basqarý sapasyn arttyryp, negizsiz shyǵyndardyń aldyn alý úshin JI tehnologııalaryn paıdalanýdy usyndy. Bul týraly Prezıdent Qazaqstan halqyna Joldaýynda aıtty.
Memleket basshysynyń aıtýynsha, uzaq merzimdi makroekonomıkalyq turaqtylyqty qamtamasyz etý úshin bıýdjet saıasatyn retteý mańyzdy.
Byltyr qabyldanǵan Bıýdjet kodeksi memleket qarjysyn tıimdi basqarýǵa jáne qarjylyq tártipti kúsheıtýge múmkindik bergen.
– Degenmen shyǵyndardyń jyl sanap kóbeıip bara jatqanyn eskergen jón. Sol sebepti qazyna qarjysyn josparlaý jáne basqarý sapasyn odan ári arttyrý qajet. Orynsyz, tıimsiz shyǵyndardyń aldyn alý úshin jasandy ıntellekt tehnologııasynyń múmkindigin paıdalanǵan durys, – dedi Prezıdent.
Sondaı-aq memlekettik qazyna júıesin tolyqqandy tsıfrlandyrý jumysyn aıaqtaý qajettigi aıtyldy.
– Bıýdjet qarajatyn basqarýdyń ortaq ádis-tásilderge negizdelgen, avtomattandyrylǵan júıesin qurý qajet. Úkimet pen Ulttyq Bankten naqty usynystar kútemin, – dedi Qasym-Jomart Toqaev.
Buǵan deıin Prezıdent Balqash AES qurylysyn keler jyly bastaýdy usyndy.
Sondaı-aq Q.Toqaev Qazaqstannyń tranzıttik áleýetin synǵa aldy.
