Prezıdent ónimdi fermerlerden tikeleı satyp alýǵa qatysty tapsyrma berdi

NUR-SULTAN. QazAqparat – Ónimdi aýyl sharýashylyǵy taýarlaryn óndirýshilerden aldyn ala tikeleı satyp alý joldaryn aıqyndaý qajet. Bul týraly Úkimettiń keńeıtilgen otyrysynda Prezıdent Qasym-Jomart Toqaev aıtty, dep habarlaıdy QazAqparat tilshisi.

«Meniń tapsyrmam boıynsha Aýyl sharýashylyǵy mınıstrligi aldyn ala satyp alý tásilderin keńirek qoldana bastady. Bıylǵy shildege deıin áleýmettik mańyzy bar 47 myń tonna azyq-túlikke qatysty osyndaı sharttar jasaldy. Degenmen, mundaı kólemdegi taýar ishki naryqqa aıtarlyqtaı yqpal etpeıtini anyq», - dedi Qasym-Jomart Toqaev.

Osy oraıda Prezıdent ónimdi aýyl sharýashylyǵy taýarlaryn óndirýshilerden aldyn ala tikeleı satyp alý joldaryn aıqyndaý qajet ekenin atap ótti.

«Munymen quzyrly mınıstrlikter aınalysýy tıis. Aýyl sharýashylyǵy mınıstrligi osy tásildi jetildirý úshin tıisti qaýymdastyqtardy jáne naryq sýbektilerin jumyldyrýy kerek», - dedi Memleket basshysy.

Budan buryn habarlanǵandaı, Prezıdent Úkimettiń baǵany turaqtandyrýǵa baǵyttalǵan sharalary tıimsiz bolǵanyn aıtty.