Prezıdent ónerkásip salasyna jasandy ıntellektini jappaı engizý isine basa mán berýge shaqyrdy
ASTANA. KAZINFORM — Memleket basshysy telekópir rejıminde Aqtoǵaı mys balqytý zaýytynyń qurylysyn bastaý rásiminde ónerkásip salasyna tsıfrlyq tehnologııa men jasandy ıntellektini jappaı engizý isine basa mán berýge shaqyrdy. Bul týraly Aqorda habarlady.
– Ozyq sheshimder kásiporynnyń ónimdiligin arttyryp, eńbek qaýipsizdigin kúsheıtýge, apattardyń aldyn alýǵa múmkindik beredi. Jaqynda ótken AI & Digital Bridge forýmynda men Úkimettiń aldyna naqty mindet qoıdym. Zaýyt salý barysynda osy máseleni eskergen jón. Eń aldymen qurylys jumysyn sapaly júrgizip, ýaqytyly aıaqtaý qajet. Osy biregeı jobany júzege asyrýǵa belsene atsalysyp jatqan barsha azamatqa, qytaılyq seriktesterimizge shynaıy rızashylyǵymdy bildiremin. Aqtoǵaı mys óńdeý kesheni Qazaqstannyń ónerkásiptegi áleýetin arttyra túsýge zor úles qosady dep senemin, – dep túıindedi sózin Prezıdent.
Kásiporynda ken baıytýdan bastap odan daıyn metall shyǵarýǵa deıingi tolyq óndiristik tsıkl qarastyrylǵan. Keshen óziniń ken ornynan alǵan mys kontsentratyn óńdeıdi. Bul shıkizat kózin ǵana qamtamasyz etip qoımaı, Qazaqstanda shyǵarylatyn ónimniń qosylǵan qunyn arttyrýǵa múmkindik beredi.
Jobany KAZ Minerals toby júzege asyrady, al qytaılyq NFC kompanııasy – ınjenerlik seriktes. Bastamaǵa shamamen 1,8 mıllıard dollar ınvestıtsııa salynady, sondaı-aq onyń aıasynda 1 myńnan astam jańa jumys orny ashylady.
2030 jyly alǵashqy mys katodyn alý josparlanyp otyr. Zaýytta mystan bólek, altyn, kúmis jáne basqa da ilespe ónimder shyǵarylady.
Telekópir barysynda Abaı oblysynyń ákimi Berik Ýálı, KAZ Minerals toby dırektorlar keńesiniń tóraǵasy Oleg Novachýk, China Nonferrous Metal Mining Group dırektorlar keńesiniń tóraǵasy Ven Gan sóz sóıledi.
