Prezıdent ónerkásipke qatysty: Keıbir adamdar ahýaldyń dál osyndaı kúıde bolýyna múddeli me

NUR-SULTAN. QazAqparat – Mashına jasaý salasyna qajetti jabdyqtar áli kúnge deıin shetelden ákelinedi. Búgin Parlament Májilisiniń jalpy otyrysynda Memleket basshysy Qasym-Jomart Toqaev osylaı málim etti, dep habarlaıdy QazAqparat tilshisi.

«Biz áli kúnge deıin birqatar ónim túrinen ımportqa táýeldimiz. Jyl ótken saıyn elimizdiń tólem balansynda ótkir tapshylyq baıqalýda. Alıýmınııden, mystan jasalǵan daıyn buıymdar jáne mashına jasaý salasyna qajetti jabdyqtar áli kúnge deıin shetelden ákelinedi. 2020 jyldyń qorytyndysy boıynsha tek munaı-gaz jáne taý-ken mashına jasaý salasynyń ımporty 4 mlrd dollardan asty. Álde, elimizdegi keıbir adamdar ahýaldyń dál osyndaı kúıde bolýyna múddeli me?!», - dedi Memleket basshysy.

Osy oraıda Prezıdent Úkimet búkil ónerkásip salasyna tereń taldaý jumysyn júrgizýi tıis ekenin tapsyrdy.

Budan buryn habarlanǵandaı, Prezıdent «Samuryq-Qazyna» qory men ondaǵy sheteldik mamandardy synady.