Prezıdent Oljas Bektenovke ekonomıkanyń naqty sektoryn qoldaýdy tapsyrdy

ASTANA. KAZINFORM – Memleket basshysy Premer-mınıstr Oljas Bektenovti qabyldady. Bul týraly Aqorda málim etti. 

Prezıdentke elimizdiń áleýmettik-ekonomıkalyq damýy, órkendeýdiń jańa baǵyttary jáne ekonomıkalyq reformalardy júzege asyrý jumystary jóninde baıandaldy. Bıylǵy qańtar-aqpan aılarynda ekonomıkanyń ósimi 5,4 paıyzdy qurady.

Premer-mınıstr Ulttyq quryltaıdyń tórtinshi otyrysynda Memleket basshysy júktegen iri ınfraqurylymdyq jáne energetıkalyq jobalardy iske asyrýǵa, tsıfrlandyrý men adamı kapıtaldy damytýǵa qatysty mindetterdi oryndaý úshin qabyldanyp jatqan sharalar týraly málimet berdi.

Qasym-Jomart Toqaev Úkimet basshysy jetekshilik etetin Respýblıkalyq shtabtyń sý tasqynyna qarsy is-sharalar jónindegi esebin tyńdady. Jaǵdaı táýlik boıy baqylaýǵa alynǵan. 37 myńnan astam qyzmetker men 13 myń tehnıka daıyndaldy.

Kezdesý sońynda Memleket basshysy ekonomıkanyń naqty sektoryn qoldaý, ınvestıtsııa tartý jáne áleýmettik saıasatty jetildirý jumystaryn jalǵastyrýdy tapsyrdy.

Buǵan deıin habarlanǵandaı, Qasym-Jomart Toqaev pen Shavkat Mırzıeev telefon arqyly sóılesip, bir-birin kele jatqan Naýryz meıramymen quttyqtaǵan bolatyn.