Prezıdent Oqý-aǵartý mınıstrine Qazaq Digital mektebi jobasyn iske asyrýdy tapsyrdy
ASTANA. KAZINFORM – Memleket basshysy Qasym-Jomart Toqaev Oqý-aǵartý mınıstri Juldyz Súleımenova qabyldady.
Kezdesý barysynda Prezıdentke 2025 jyldyń qorytyndylary men 2026 jylǵa arnalǵan negizgi mindetter tanystyryldy.
Mınıstrdiń aıtýynsha, jańa Konstıtýtsııa qundylyqtaryn ilgeriletý maqsatynda oqý baǵdarlamalary men oqýlyqtardyń mazmunyn jańartý jumystary júrgizilýde. Sonymen qatar «Taza Qazaqstan» bastamasy aıasynda ekologııalyq bilim berý standarttary ázirlenip, mektepterde «Adal azamat» birtutas tárbıe baǵdarlamasy engizilýde.
Juldyz Súleımenova bastaýysh bilim berý mazmunyna júıeli taldaý jasalǵanyn atap ótti. Onyń aıtýynsha, mektep baǵdarlamalary oqý, jazý jáne esepteý daǵdylaryna basymdyq bere otyryp qaıta qaralyp jatyr.
Sondaı-aq mınıstr «Keleshek mektepteri» ulttyq jobasy aıasynda 460 myń oqýshyǵa arnalǵan 217 mekteptiń qurylysy aıaqtalǵanyn málimdedi.
Salany tsıfrlandyrý baǵytynda da birqatar sharalar júzege asyrylýda. Qazirgi ýaqytta mektepterdiń 99 paıyzy ınternetke qosylǵan. «Áleýmettik ámııan» jobasy 6760 mektepke engizilgen. Sonymen qatar dıplomdar, attestattar men anyqtamalar tsıfrlyq formatqa kóshirildi. «Ustaz» platformasy pedagogterdi attestattaý úderisin tolyq avtomattandyrýǵa múmkindik beredi.
Mınıstrdiń málimetinshe, 240 myńnan astam muǵalim jasandy ıntellektini qoldaný boıynsha qaıta daıarlaýdan ótken. Taǵy 200 myń pedagog ChatGPT Edu jobasy aıasynda JI-assıstentterdi paıdalaný daǵdylaryn meńgerýde.
Infraqurylymdy damytý maqsatynda 184 bilim berý nysany iske qosylǵan. Nátıjesinde úsh aýysymdy 80 jáne apatty jaǵdaıdaǵy 31 mekteptiń máselesi sheshimin tapqan. Sonymen qatar 209 mektepke kúrdeli jóndeý júrgizilip, 1192 pándik kabınet zamanaýı quraldarmen jabdyqtalǵan.
Balabaqshaǵa kezek shamamen eki esege qysqarǵany da aıtyldy.
Kezdesý qorytyndysy boıynsha Prezıdent bilim sapasyn arttyrý jáne onyń qoljetimdiligin qamtamasyz etý, mektepterdegi oryn tapshylyǵyn azaıtý, jumysshy mamandardy daıarlaý júıesin damytý, bıýdjet qarajatyn tıimdi paıdalaný jáne bilim berý salasyn tsıfrlyq transformatsııalaý, sonyń ishinde Qazaq Digital Mektebi jobasyn iske asyrý boıynsha birqatar tapsyrma berdi.
Sondaı-aq Memleket basshysy aldaǵy úsh jylda «Keleshek mektepteri» jobasynyń ozyq tájirıbesin barlyq bilim berý uıymdaryna engizýdiń mańyzdylyǵyn atap ótti.
Aıta keteıik, Memleket basshysy búgin Qarýly Kúshterde birqatar kadrlyq taǵaıyndaýlar jasady.
