Prezıdent Ókili Vashıngtonda AQSh senatory Stıv Deınsti marapattady
VAShINGTON. KAZINFORM – Qazaqstan Respýblıkasynyń Elshiliginde Prezıdent Qasym-Jomart Toqaevtyń atynan AQSh senatory Stıv Deıns eki el arasyndaǵy dostyqty nyǵaıtýǵa jáne yntymaqtastyqty damytýǵa qosqan eleýli úlesi úshin I dárejeli «Dostyq» ordenimen marapattaldy, dep habarlaıdy SІM baspasóz qyzmeti.
Marapatty tapsyrý barysynda Qazaqstan Prezıdentiniń AQSh-pen yntymaqtastyqtyń ózekti máseleleri boıynsha kelissózder protsesindegi Qazaqstan Respýblıkasy Prezıdentiniń Ókili E.Qazyhan eki el arasyndaǵy baılanystardyń beriktigin atap ótti.
– Senator S.Deınstyń kúsh-jigeriniń arqasynda Qazaqstan men AQSh arasyndaǵy ekijaqty qatynastar ózara is-qımyldyń búkil kezeńindegi eń joǵary deńgeıge jetti, – dedi Prezıdent Ókili.
E.Qazyhan senatordyń parlamentaralyq ózara is-qımyldy damytýǵa qosqan úlesin erekshe atap ótti. Atap aıtqanda, onyń AQSh Kongresinde Ortalyq Azııa boıynsha dostyq tobyn qurý bastamasy, Djekson-Venık túzetýin joıýǵa baǵyttalǵan zańnamalyq bastamalardy júıeli túrde ilgeriletýi, sondaı-aq AQSh Senatynda «C5+1» platformasynyń strategııalyq mańyzdylyǵy týraly qarardyń qabyldanýyna qoldaý kórsetýi joǵary baǵalandy.
Sonymen qatar qazaqstandyq dıplomat senatordyń Qazaqstan-AQSh arasyndaǵy ekijaqty yntymaqtastyqty tereńdetýge, sondaı-aq Ortalyq Azııanyń basqa memleketterimen ózara is-qımyldy damytýǵa qosqan úlesin atap ótti.
S.Deıns óz kezeginde kórsetilgen qurmet úshin alǵys bildirip, marapattyń tabystalýyn joǵary baǵalaıtynyn atap ótti jáne ekijaqty qatynastardy ınstıtýtsıonaldandyrý men odan ári damytýǵa, onyń ishinde eki eldiń zań shyǵarýshy organdary deńgeıinde, belsendi qadamdar jasaýǵa daıyn ekenin rastady.
Kezdesý barysynda taraptar ekijaqty kún tártibindegi ózekti máselelerdi talqylap, memleketter arasyndaǵy Keńeıtilgen strategııalyq seriktestikti odan ári nyǵaıtýǵa ózara qyzyǵýshylyǵyn rastady.
Aıta keteıik, buǵan deıin Syrqy ister mınıstri Ermek Kósherbaev AQSh-ta G20 sammıtine Qazaqstannyń qatysýy boıynsha daıyndyq máselelerin talqylady.
