Prezıdent ókilettigin uzartý jónindegi referendým ótkizý jónnidegi bastamashy toptyń Memleket basshysyna úndeýi

***

Qazaqstan Respýblıkasynyń Prezıdenti - Elbasy Nursultan Ábishuly Nazarbaevqa

Asa qurmetti Nursultan Ábishuly!

Biz Sizdiń ókilettigińizdi 2020 jylǵa deıin uzartý jónindegi respýblıkalyq referendýmnyń bastamashylary Sizge, Qazaqstan Respýblıkasynyń Tuńǵysh Prezıdenti - Elbasyna úndeý jasap otyrmyz.

Bizdiń bastamamyz qoǵamda aıyryqsha serpilis týǵyzdy jáne 5 mıllıonnan astam qazaqstandyqtar, ıaǵnı saılaýshylardyń 55 paıyzy referendým ótkizýdi qoldap, óz qoldaryn qoıdy. Bul Sizdiń júrgizip otyrǵan saıası baǵyttyń búkilhalyqtyq qoldaýǵa ıe ekenin barynsha aıqyndylyqpen dáleldeıdi.

Respýblıka Konstıtýtsııasyna sáıkes bıliktiń jalǵyz qaınar kózi halyq bolyp tabylady jáne sol halyq Sizdi aldaǵy onjyldyqta elimizdi ómir súrý deńgeıi joǵary sanalatyn álemniń damyǵan memleketteri qataryna qosýǵa qabiletti kóshbasshy retinde sanaıdy.

Saılaýshylardyń óz erik-qalaýyn bildirýi memleketimizdiń táýelsizdigin nyǵaıtýǵa, onyń ilgeri damýyna jáne azamattarymyzdyń ál-aýqatynyń artýyna baǵyttalǵan Sizdiń qajyrly qyzmetińizge berilgen shynaıy baǵa.

Táýelsizdiktiń ótken 19 jyly ishinde eldiń jalpy ishki óniminiń 16 eseden astam óskenin atap aıtýdyń ózi jetkilikti. Jalaqy, zeınetaqy jáne ózge de áleýmettik tólemder udaıy ósip keledi. Jańa mektepter, aýrýhanalar men mádenıet úıleri boı kóterýde.

Keń aýqymdy baǵdarlamalar, sonyń ishinde Qazaqstannyń ındýstrııalyq áleýetin túpkilikti jańartýǵa jáne myńdaǵan jańa jumys oryndaryn ashýǵa múmkindik beretin eldiń údemeli-ındýstrııalyq-ınnovatsııalyq damý baǵdarlamasy iske asyrylýda.

Óziniń dál búgingideı halyqaralyq zor bedelge ıe bolýynda Qazaqstan naqty Sizge, álemdik deńgeıdegi kóshbasshyǵa qaryzdar. Buǵan Semeı synaq polıgonynyń jabylýy men ıadrolyq qarýdan bas tartý, Qazaqstannyń EQYU-ǵa tóraǵalyq etýi, ıntegratsııalyq bastamalaryńyz ben ózge de qolǵa alǵan isterińiz yqpal etti.

Sizdiń basshylyǵyńyzdyń arqasynda Qazaqstan aıtýly jeńisterge qol jetkizdi. Alaıda aldymyzda atqarar is kóp jáne dem berýshisi ózińiz bolyp otyrǵan barlyq bastamalar naq Sizdiń basshylyǵyńyzben jalǵasyn tapqany asa mańyzdy. Sizdiń baǵa jetpes tájirıbeńiz ben qaısar minezińiz, memleketshil tulǵańyz jáne eshbir daǵdarystar men synaqtarǵa boı aldyrmaı eldegi barlyq isterdiń tynys-tirshiligin árdaıym sezip-bilip otyratyn qabiletińiz olardy iske asyrýdyń kepiline aınalǵan.

Beıbit ómir, qoǵamdaǵy turaqtylyq pen otbasyndaǵy bereke el úshin maqtanysh sezim jáne keleshekke degen senim referendým ótkizý ıdeıasyn búkil halyq bolyp qoldaýdyń alǵy sharty bolady. Bul - azamattardyń ózińizdiń basshylyǵyńyzben Qazaqstannyń qol jetkizgen mol tabystaryna degen rızashylyq sezimi jáne olardyń jańa jeńisterge degen úmiti.

Qazaqstannyń mıllıondaǵan turǵyndary atynan bastamashy top Sizge, qurmetti Nursultan Ábishuly, úndeý jasap referendým ótkizýge kelisim berýińizdi suraıdy.

Halyqtyń erik-qalaýy Siz úshin qasıetti sanalady jáne Siz eshkimge de halyq pikirimen sanaspaýǵa, elep-eskermeýine jol bermeısiz. Siz bar ǵumyryńyzdy halqyńyzǵa jáne Otanymyzǵa qyzmet etýge arnap kelesiz.

Halyq memleketimizdiń qalyptasýynyń osynaý qıyn-qıystaý jyldarynda Sizdi árdaıym qoldap, buljymaı sońyńyzdan erdi. Búginde ıaǵnı, elimiz úshin osynaý taǵdyrsheshti sátte Siz óz halqyńyzdyń bastamasyn qoldaıdy dep senemiz.

Qazaqstan Respýblıkasynyń Prezıdenti - Elbasy Nursultan Ábishuly Nazarbaevtyń Prezıdenttik ókilettigin uzartý jónindegi referendým ótkizý jónindegi bastamashy top

2011 jyl, 12 qańtar.