Prezıdent ókilettigin uzartý jónindegi referendým ótkizý jónindegi bastamashy toptyń QR Parlamentiniń depýtattaryna úndeýi
ASTANA. 12 qańtar. QazAqparat - Qazaq aqparat agenttigi Prezıdent ókilettigin uzartý jónindegi referendým ótkizý jónindegi bastamashy toptyń QR Parlamentiniń depýtattaryna úndeýin jarııalaıdy.
****
Qurmetti depýtattar!
Biz, Qazaqstan Respýblıkasynyń Prezıdenti - Elbasy Nursultan Ábishuly Nazarbaevtyń Prezıdenttik ókilettigin 2020 jylǵa deıin uzartý jónindegi referendýmnyń bastamashy tobynyń músheleri, Sizderge joǵary zań shyǵarýshy bıliktiń ókilderi retinde úndeý jasap otyrmyz.
Referendým ótkizý jónindegi bizdiń bastamamyzdyń túrli ulttar men dinder ókilderi, barlyq jastaǵy býyndar men áleýmettik toptar tarapynan búkilhalyqtyq qoldaýǵa ıe bolýy Memleketimizdiń basshysyna degen asa joǵary senimdi aıǵaqtaıdy.
Bul qoldaý - elimizdiń Tuńǵysh Prezıdentiniń memlekettilikti nyǵaıtýǵa, Qazaqstannyń serpindi áleýmettik-ekonomıkalyq damýyn qamtamasyz etýge jáne onyń halyqaralyq bedelin arttyrýǵa baǵyttalǵan kóregen saıasatyn shúbásiz moıyndaý bolyp tabylady.
Biz belsendi azamattyq ustanymy men el keleshegine degen janashyrlyǵy úshin barsha otandastarmyzǵa rızashylyǵymyzdy bildiremiz. Biz sondaı-aq bastamamyzdy belsendi ári jan-jaqty qoldaǵan Parlament depýtattaryna alǵysymyzdy aıtamyz.
Referendým ıdeıasyna qoldaý kórsetken 5 mıllıonnan astam qazaqstandyqtardyń atynan Sizderden Parlament palatalarynyń birlesken otyrysynyń qaraýyna «Qazaqstan Respýblıkasynyń Prezıdenti - Elbasy N. Nazarbaevtyń Prezıdenttik ókilettigin respýblıkalyq referendýmda 2020 jylǵa deıin uzartý múmkindigin kózdeıtin Qazaqstan Respýblıkasy Konstıtýtsııasyna ózgeris engizý týraly» máseleni shyǵarýlaryńyzdy suraımyz.
Bul - búkilhalyqtyq referendýmdy qoldaýǵa qoldaryn qoıyp, ózderiniń bolashaǵy men elimizdiń keleshek damýyn Qazaqstannyń Tuńǵysh Prezıdentimen baılanystyratyn respýblıka saılaýshylarynyń jartysynan astamynyń tikeleı erik-qalaýy.
Qazaqstan Respýblıkasynyń Prezıdenti - Elbasy Nursultan Ábishuly Nazarbaevtyń Prezıdenttik ókilettigin uzartý jónindegi referendým ótkizý jónindegi bastamashy top
2011 jyl, 12 qańtar.
