Prezıdent ókilettigi beıbit ári órkenıetti túrde aýysty - Dáýren Abaev
ASTANA. QazAqparat - QR Aqparat jáne qoǵamdyq damý mınıstri Dáýren Abaev Elbasy Nursultan Nazarbaevtyń prezıdenttik ókilettigin toqtatýy týraly pikir bildirdi, dep habarlaıdy Qazaqparat tilshisi.
"Búgin tarıhı oqıǵanyń kýási boldyq. Bılik ókilettigi jańa prezıdentke berildi. Bul protsess beıbit túrde, eń bastysy órkenıetti túrde júrgizildi. Tipti bul kúni "Tumar - 2019" marapatyn tabystap jatyrmyz. Nursultan Ábishuly atqarǵan sharýa az emes, bul týraly uzaq aıtýǵa bolady. Nursultan Nazarbaev dáýirinde bizdiń televızııanyń qalyptasqanyn jáne marapattaý ótip jatqan ǵımarattyń (Qazmedıa ortalyǵy - red.) turǵyzylǵanyn atap ótken jón. Qazaqstannyń Tuńǵysh Prezıdenti Nursultan Nazarbaevqa erekshe alǵys aıtqym keledi", - dedi Dáýren Abaev Astanada "Tumar" ulttyq televızııalyq báıgesiniń marapattaý rásiminde.
Aıta keteıik, elordanyń «Qazmedıa» ortalyǵynda «Tumar» ulttyq televızııalyq báıgesiniń saltanatty rásimi bastaldy.
Bıylǵy jyly baıqaý 9 nomınatsııa boıynsha ótkiziledi. Úmitkerler, «Úzdik televızııalyq serıal», «Úzdik áleýmettik joba», «Úzdik derekti fılm», «Úzdik aqparattyq-taldaý baǵdarlamasy», «Televızııalyq maýsymnyń úzdik oqıǵasy», «Úzdik oıyn-saýyq jobasy», «Úzdik óńirlik telejoba», «Úzdik telejýrnalıst», «Úzdik telejúrgizýshisi» atalymdarynda baq synaıdy.
