Prezıdent Nursultan Nazarbaev el aldyndaǵy 10 negizgi mindetti atady
«Men júzege asyrýymyz kerek 10 mindetti kórip otyrmyn. Olardyń mazmuny týraly qysqasha aıtyp ótsem. Birinshisi - qazaqstandyq ındýstrııa jańa tehnologııalardy engizýde flagman bola bilýi kerek. Biz ónerkásipte óndiris protsesterin tsıfrlandyrý men zamanaýı bıznes-modelderdi ıgerý arqyly eńbek óndirisiniń deńgeıin kóterýge tıispiz. Ekinshiden, resýrstyq áleýetti qoldaný tıimdiligin barynsha jaqsartý kerek. Qazirgi ýaqytta aqparattyq-tehnologııalyq sheshimderdi engizý talap etilip otyr. Bul shyǵarylatyn ónimderdiń úlesin arttyrýǵa, olardy qaıta óńdeý tereńdigin meńgerýge, sonymen birge energııany únemdeýge jáne óndiristiń ekologııasynyń jaqsarýyna múmkindik beredi», - dedi Nursultan Nazarbaev.
Memleket basshysy barsha qazaqstandyqtarǵa júktelip otyrǵan mindettiń úshinshisi - agroónerkásip keshenin jańa tehnologııalyq deńgeıge kóterý ekenin atap ótti. Nursultan Nazarbaevtyń aıtýynsha, bul aýyl sharýashylyǵynda eńbek ónimdiligi men óńdelgen ónim eksportyn túbegeıli arttyrýǵa serpin beredi.
«Tórtinshi - transport pen logıstıkalyq ınfraqurylymdy odan ary damytý. Tsıfrlyq tehnologııalardy engizý men Intellektýaldy transport júıesin qurý júk tasymaldaý merzimderin qysqartýǵa jáne tranzıtten túsetin tabystardy eseleýge múmkindik beredi. Besinshi - TÚKSh jáne qurylys salasynda zamanaýı tehnologııalardy qoldaný. Qurylys júrgizýdiń jańa ádisteri, ǵımarattyń energııany únemdeý talabyn kóterý, ınfraqurylymdardy ıntellektýaldyq júıemen basqarý - qazaqstandyqtardyń ómir sapasyn arttyrýǵa jol ashady», - deıdi Nursultan Nazarbaev.
Memleket basshysy Qazaqstandaǵy qarjy sektorynyń «qaıta jandanýy» - 10 mindettiń altynshysy ekenin atady.
«Banktik júıelerdi damytý baqylaýdyń kúsheıtilýimen jáne qarapaıym azamattardyń múddesi úshin júrgizilýi kerek. Bankterge ıelik etetin adamdardyń jaýapkershiligin arttyrýdyń mańyzy zor. Jetinshi - adam kapıtalynyń jańa sapasy. Bilimniń barlyq júıesi zamanaýı talaptarǵa jáne ekonomıkanyń baryq qajettiligine jaýap berýi tıis. Segizinshi - bul tıimdi memlekettik basqarý. Tsıfrlyq tehnologııalar bıznesti qaıta retteýdi jalǵastarýǵa, memleket tarapynan kórsetiletin qyzmet pen memlekettik qoldaýdyń sapasyn arttyrýǵa, azamattardyń qajettiligin barynsha esepke alýǵa múmkindik beredi», - dedi Nursultan Nazarbaev.
Memleket basshysy sonymen birge, toǵyzynshydan, zańnyń ústemdigi men jemqorlyqpen kúres memlekettik saıasattyń basym baǵyttarynyń biri bolyp qalatynyn aıtyp ótti. Onynshy mindet retinde «Smart sıtı» tehnologııasynyń engizilýi ósip bara jatqan qalalardyń máselelerin tıimdi túrde sheshýge jol ashyp, ınvestorlardyń qyzyǵýshylyǵyn týǵyzatynyn jetkizdi.
«Bizdiń bárimiz búgingi kúni osy on tapsyrmany oryndaýǵa kúsh salýymyz kerek. Joldaýdyń tolyq mátininde olardyń barlyǵy kórsetiledi», - dedi Nursultan Nazarbaev.
