Prezıdent Nursultan Nazarbaev Astanada halyqtyq serýenge qatysýda
Elordadaǵy eńseli monýmenttiń aldy búgin erekshe bezendirilip, ár ulttyń ókilderi óziniń ulttyq kıimderimen sahnaǵa shyqty. 1 mamyr merekesine arnalǵan halyqtyq serýen «Qazaq eli» monýmentiniń aldyndaǵy alańda saǵat 11.00-de bastaldy. Qonaqtar elordalyq ulttyq mádenı birlestikterdiń shyǵarmashylyq ujymdarynyń, Astana qalasy Memlekettik akademııalyq fılarmonııasynyń ártisteriniń jáne otandyq estrada juldyzdarynyń qatysýymen «Rýhanı jańǵyrý - birlik pen tutastyq negizi» atty teatrlandyrylǵan qoıylymdy tamashalady. Kontserttik baǵdarlamany Týretskıı horynyń «Prazdnık pesnı» án keshi jalǵastyryp, erler ujymymen birge sahna tórinde Týretskııdiń SOPRANO áıelder toby óner kórsetti. Áıgili reseılik toptan keıin sahna tórinde Qazaqstan halqy Assambleıasynyń etnomádenı birlestikteri ánnen shashý shashty.
Budan bólek, «Qazaq eli» monýmentiniń aldyndaǵy alańda qazaq kúresi, arqan tartys, asyq atý, gir tasyn kóterý jáne qol kúres syndy ulttyq sport túrlerinen jarystar ótkiziletin bolady.
Sonymen birge, dál búgin Birlik kúnine oraı saǵat 13.00-de «Báıterek» monýmentiniń aldyndaǵy alańda «Dostyq sherýi» velosherýi bastaý alady. Shara elordada velosıped tebý maýsymyn ashady. Sonymen qatar saǵat 15:00-de dombyrashylardyń oryndaýynda «Uly dala úni» atty fleshmob uıymdastyrylady. Shara barysynda 500 adam Qurmanǵazynyń áıgili «Saryarqa» kúıin kópshilik nazaryna usynady.
Budan bólek qalanyń kitaphanalarynda, mýzeılerinde, teatrlarynda jáne basqa da mádenıet mekemelerinde birlik pen dostyq merekesine arnalǵan taqyryptyq kórmeler, spektaklder men kontsertter ótkiziledi.
