Prezıdent Nurlybek Nálibaevqa otandyq taýar óndirýshilerdi qoldaýdy tapsyrdy
ASTANA. KAZINFORM – Memleket basshysy Premer-mınıstrdiń birinshi orynbasary Nurlybek Nálibaevty qabyldady, dep habarlady Aqorda.
Qasym-Jomart Toqaevqa ónerkásipti damytý jáne iri ınfraqurylymdyq jobalardy júzege asyrý máseleleri jóninde baıandaldy.
Prezıdentke óńdeý ónerkásibinde júrgizilip jatqan negizgi jumystar týraly aqparat berildi.
Premer-mınıstrdiń birinshi orynbasary qosylǵan quny joǵary ónim shyǵarýdy arttyrý jáne energetıkalyq ınfraqurylymdy jańǵyrtý josparyna toqtaldy.
Sonymen qatar Memleket basshysyna kólik-logıstıka ınfraqurylymy men qurylys salasyn damytý jaıynda aıtyldy.
Kezdesý sońynda Qasym-Jomart Toqaev ınfraqurylymdyq jobalardyń sapaly júzege asyrylýyn qamtamasyz etýdi, otandyq taýar óndirýshilerdi qoldaýdy jáne aldaǵy jylý berý maýsymyna daıyndyq sharalaryn baqylaýdy kúsheıtý jóninde tapsyrma berdi.
Aıta keteıik, Qasym-Jomart Toqaev Túrkııa Prezıdenti Rejep Taııp Erdoǵandy Astanaǵa shaqyrdy.
