Prezıdent: Nurǵısa Tilendıevtiń esimi qazaq mádenıetimen birge máńgi jasaı beredi
ASTANA. KAZINFORM — Halyq qaharmany, kórnekti mádenıet jáne óner qaıratkeri, birtýar kompozıtor Nurǵısa Tilendıevtiń týǵanyna 100 jyl tolýyna oraı týǵan jeri — Almaty oblysy Ótegen batyr aýylynda uly tulǵanyń eskertkishi boı kóterip, jańa mádenıet úıi ashyldy, dep habarlaıdy Mádenıet jáne aqparat mınıstrliginiń baspasóz qyzmeti.
Saltanatty is-sharaǵa Mádenıet jáne aqparat mınıstri Aıda Balaeva, Almaty oblysynyń ákimi Marat Sultanǵazıev, qoǵam jáne mádenıet qaıratkerleri, zııaly qaýym ókilderi men óner maıtalmandary qatysty.
El Prezıdenti Qasym-Jomart Toqaev quttyqtaý sózinde eskertkishtiń ashylýy halqymyzdyń áıgili tulǵaǵa degen aıryqsha qurmeti men ystyq yqylasynyń belgisi ekenin atap ótti.
— Nurǵısa Tilendıev órkenıetimizdiń órisin keńeıtýge ólsheýsiz úles qosty, elimizdiń mádenı murasyn jańǵyrtýǵa, qazaqtyń án-kúıin jer júzine tanytýǵa zor eńbek sińirdi. «Otyrar sazy» orkestriniń negizin qalap, ultymyzdyń rýhanı dúnıetanymyn baıyta tústi. Ol altyn qorymyzǵa engen pesalar men fılmderge mýzyka jazyp, teatr jáne kıno salasynda qaıtalanbas qoltańbasyn qaldyrdy. Nurǵısa Tilendıevtiń teńdessiz murasy áli talaı urpaqqa taǵylym bereri sózsiz. Onyń esimi qazaq mádenıetimen birge máńgi jasaı beredi, — delingen quttyqtaý hatynda.
Memleket basshysynyń mereıli sátke oraı joldaǵan lebizin jetkizgen Aıda Balaeva óz sózinde uly kompozıtordyń qazaq mádenıetine qosqan ólsheýsiz eńbegin erekshe atap ótti.
— Uly kompozıtor halqymyzdyń tarıhymen taǵdyryn, qýanyshy men qaıǵysyn, arman-muratyn ónermen órnektep, artynda mol mura qaldyrdy, — dedi A. Balaeva.
Mınıstr Nurǵısa Tilendıevtiń 100 jyldyǵyna oraı elimizde jáne shetelde aýqymdy mádenı is-sharalar uıymdastyrylyp jatqanyn sóz etti.
Atap aıtsaq, TÚRKSOI halyqaralyq uıymy 2025 jyldy «Nurǵısa Tilendıev jyly» dep jarııalap, Ankarada kórme, derekti fılm kórsetilimi men kompozıtor shyǵarmalarynan kontsert ótkizdi. Parıjdegi ıÝNESKO shtab-páterinde «Shabyt bastaýy» atty kórme ashylyp, AQSh-ta Karnegı-holda arnaıy ekspozıtsııa, Beıjińde «Qustar qaıtyp barady» atty shyǵarmashylyq kesh uıymdastyryldy. Sondaı-aq Máskeý, Frankfýrt, Bishkek, Almaty jáne Túrkistan qalalarynda túrli kontsertter men festıvalder ótti.
— Búgingi eskertkishtiń ashylýy da uly tulǵanyń rýhyn ulyqtaýǵa arnalǵan is-sharalardyń bir parasy dep bilemiz. Osynaý eńseli eskertkish — Nurǵısa Tilendıevtiń ult júregindegi máńgilik ornyn aıshyqtaıdy. Nurǵısa Atabaıulynyń qundy qazynasy qazaqtyń máńgilik murasy bolyp qala bereri sózsiz, — dedi mınıstr.
Saltanatty jıynǵa qatysýshylar 400 oryndyq jańa mádenıet úıiniń ashylýyna qatysyp, kórme zaldaryn aralady.
Іs-shara aıasynda arnaıy kontsert ótip, dáýlesker kúıshiniń ánderi men kúıleri oryndaldy.
Aıta keteıik, Nurǵısa Tilendıevtiń músinin belgili músinshiler Aıdos Búrkitbaev pen Tımýr Ermuhametov jasaǵan. Qoladan quıylǵan eskertkishtiń bıiktigi — 2,85 metr, tuǵyry — 1,5 metr, jalpy bıiktigi — 4,35 metr. Tuǵyry granıtten jasalǵan. Eńseli eskertkish — uly sazgerdiń ult rýhanııatyna sińirgen eńbegine degen el qurmetiniń aıǵaǵy.
Budan buryn Parıj qalasyndaǵy ıÝNESKO shtab-páterinde qazaqtyń kórnekti kúıshi-kompozıtory, dırıjer Nurǵısa Tilendıevtiń 100 jyldyǵyna arnalǵan «Ǵasyr áýenderi: Tilendıevke taǵzym» atty merekelik kontsert ótkenin jazǵanbyz.