Prezıdent Nıderland Premer-mınıstriniń mindetin atqarýshy Mark Rıýttemen sóılesti
ASTANA. QazAqparat - Prezıdent Qasym-Jomart Toqaev Nıderland Premer-mınıstriniń mindetin atqarýshy Mark Rıýttemen telefon arqyly sóılesti, dep habarlaıdy QazAqparat.
Nıderland tarapynyń bastamasymen Memleket basshysy Qasym-Jomart Toqaev Nıderland Premer-mınıstriniń mindetin atqarýshy Mark Rıýttemen telefon arqyly sóılesti.
Áńgimelesý barysynda Qazaqstan men Nıderland arasyndaǵy ınvestıtsııalyq jáne saýda-ekonomıkalyq yntymaqtastyqtyń qazirgi jaı-kúıi men perspektıvalaryna basa mán bere otyryp, ekijaqty kún tártibiniń ózekti máseleleri qarastyryldy.
Nıderland elimizdiń ekonomıkasyna tikeleı ınvestıtsııa quıý jóninen birinshi orynda tur. 2022 jyldyń qorytyndysy boıynsha ózara saýda-sattyq 26 paıyzǵa artyp, 6 mıllıard dollarǵa jaqyndady.
Mark Rıýtte eki eldiń arasyndaǵy qarym-qatynastarǵa joǵary baǵa berdi. Onyń aıtýynsha, Nıderland Qazaqstandy Ortalyq Azııa aımaǵyndaǵy negizgi saýda-ekonomıkalyq jáne ınvestıtsııalyq seriktes retinde qarastyrady.
Halyqaralyq kún tártibin talqylaý aıasynda Memleket basshysy beıbitshilik pen kelisim úshin barlyq eldiń jan-jaqty yntymaqtastyǵyn BUU Jarǵysynyń qaǵıdattaryna saı jolǵa qoıý mańyzdy ekenin aıtty.
