Prezıdent Naýryz merekesine oraı birqatar eldiń basshylaryna quttyqtaý jedelhattaryn joldady

ASTANA. KAZINFORM — Qasym-Jomart Toqaev Naýryz merekesine oraı birqatar eldiń basshylaryna quttyqtaý jedelhattaryn joldady. Bul týraly Aqordanyń baspasóz qyzmeti habarlady.

Memleket basshysy Ózbekstan Prezıdenti Shavkat Mırzıeevti, Qyrǵyzstan Prezıdenti Sadyr Japarovty, Tájikstan Prezıdenti Emomalı Rahmondy, Túrikmenstan Prezıdenti Serdar Berdimuhamedovti, Túrikmenstan Halk Maslahatynyń Tóraǵasy Gýrbangýly Berdimuhamedovti, Ázerbaıjan Prezıdenti Ilham Álıevti, Túrkııa Prezıdenti Rejep Taııp Erdoǵandy, Iran Prezıdenti Masýd Pezeshkıandy, Irak Prezıdenti Abdýl Latıf Rashıdti, Pákistan Premer-mınıstri Shahbaz Sharıfti Ulystyń uly kúnimen quttyqtady.

Qazaqstan Prezıdenti jedelhattarynda Naýryz merekesi elderimizdiń ǵasyrlar boıy qalyptasqan dostyq, baýyrlastyq jáne ózara qurmet dástúrlerimen úılesetinin ári tabıǵat jańarýynyń nyshany sanalatynyn jazǵan. Sonymen qatar áz-Naýryzdyń qasterli qundylyqtary halyqtarymyzdyń ıgiligine baǵyttalǵan baılanystardy odan ári damytýǵa septigin tıgizetinine senim bildirgen.

Aıta ketelik Memleket basshysynyń atyna Naýryz meıramyna oraı quttyqtaý jedelhattary kelip jatyr.