Prezıdent Natalııa Sats atyndaǵy teatrdy 80 jyldyq mereıtoıymen quttyqtady
ASTANA. KAZINFORM — 2025 jylǵy 7 qarashada «Astana Balet» teatrynyń sahnasynda Natalııa Sats atyndaǵy Memlekettik akademııalyq balalar men jasóspirimder teatrynyń 80 jyldyǵyna arnalǵan saltanatty is-shara ótti.
Ańyzǵa aınalǵan ujymdy mereıtoıymen Memleket basshysy Qasym-Jomart Toqaev quttyqtady. Prezıdenttiń quttyqtaý hatyn QR Mádenıet jáne aqparat mınıstri Aıda Balaeva oqyp berdi.
Memleket basshysy teatrdyń balalar ónerin damytýdaǵy rólin, aǵartýshylyq mıssııasyn jáne eldiń rýhanı ómirindegi mańyzyn erekshe atap ótti.
— Sizderdiń san qyrly shyǵarmashylyqtaryńyz elimizdiń mádenı damýyna, qoǵamymyzda jasampazdyq pen gýmanızm qundylyqtarynyń ornyǵýyna aıryqsha úles qosyp keledi. Memleket teatrdy mádenıet oshaǵy, óner men adamǵa adal qyzmet etýdiń rýhanı keńistigi retinde qabyldaıtyn kózqarastaryńyzdy joǵary baǵalaıdy. Teatrdyń keń aýqymdy qaıta jańǵyrtylýy jańa kórkem ıdeıalardy júzege asyryp, kórermen yqylasyna bólenetin áserli qoıylymdar jasaýǵa tyń múmkindikter ashady dep senemin. Kórermenderdiń shynaıy qýanyshy men alǵysy sizderdi Qazaqstan ıgiligi jolyndaǵy jańa bıikterge jeteleı bersin. Barsha ujymǵa shyǵarmashylyq shabyt, tolaıym tabys jáne teatrdyń odan ári órkendeı berýin tileımin, — delingen quttyqtaýda.
Іs-sharada teatr qyzmetkerlerine Memleket basshysynyń Jarlyǵymen memlekettik nagradalar tabys etildi. Atap aıtqanda, Oleg Gostev «Parasat» ordenimen, Raısa Lesheva men Maqsat Sahıuly «Qurmet» ordenimen, Aıdar Qurmanbaev, Inna Porotıkova, Marına Sambetbaeva jáne Artem Seleznev «Eren eńbegi úshin» medalimen marapattaldy. Sondaı-aq, Aleksandr Rýsınovıchke «Shapaǵat» medali, Anna Kýzembaevaǵa «Qazaqstannyń eńbek sińirgen qaıratkeri» ataǵy berildi.
Marapattardy Memleket basshysynyń atynan Aıda Balaeva tabys etti. Mınıstr ujymǵa shyǵarmashylyq tabys pen kórermenniń ystyq yqylasyn tiledi.
Astanadaǵy mereıtoılyq gastrolder SATS ComUnity balalar stýdııasynyń tárbıelenýshileri sahnalaǵan «Pısma ıstorıı» atty mınıatıýramen ashyldy. Bul — jas akterler áıgili teatrdyń tarıhyn sahna tilimen órnektegen áserli qoıylym.
Sondaı-aq elorda kórermenderine teatrdyń negizin qalaýshynyń ómirine negizdelgen «SATs» spektakl-rekonstrýktsııasy usynyldy. Qoıylymda Qazaqstandaǵy alǵashqy balalar men jasóspirimder teatrynyń ashylýy qarsańyndaǵy daıyndyq barysy beınelengen.
Sahnada 1945 jylǵy 7 qarasha oqıǵalary qaıta jandanyp, Natalııa Sats jetekshiligimen akterler Evgenıı Shvartstyń «Krasnaıa shapochka» ertegisin sahnaǵa ázirleýde.
Qoıylymda Natalııa Sats rólin Qazaqstannyń eńbek sińirgen artısi, Reseıdiń «Drýjba» ordeniniń kavaleri Tatıana Tarskaıa somdady. Qoıylymnyń rejısseri — Reseıdiń «Zolotaıa maska» teatraldyq syılyǵynyń laýreaty Galına Pıanova.
Seksen jyl ishinde teatr úlken qalyptasý jolynan ótti. Onyń sahnasynda Shvarts, Pýshkın, Marshak, Tolstoı jáne zamanaýı avtorlardyń týyndylary qoıyldy.
Osy teatrda tárbıelengen ondaǵan akter búginde qazaqstandyq sahna juldyzdaryna aınaldy. Ýaqytpen birge jańaryp, kórermen kózaımyna aınalǵan teatr meıirimniń, shabyttyń jáne ǵajaıypqa senimniń sımvoly bolyp keledi.
Aıta ketelik «URKER – 2025» ulttyq báıgesiniń jeńimpazdary anyqtaldy.