Prezıdent N. Nazarbaev «jasyl» damýǵa qatysty arnaıy ınstıtýt qurýdy tapsyrdy

ASTANA. 11 qazan. QazAqparat - «Jasyl» damýmen aınalysatyn arnaıy ınstıtýt qurý kerek. Búgin Aqordada elimizdiń ótken 9 aıynyń damý qorytyndylaryna arnalǵan Úkimettiń keńeıtilgen otyrysynda Memleket basshysy Nursultan Nazarbaev osyndaı tapsyrma júktedi.

«Eger biz zaman aǵymynan qalǵymyz kelmese «Samuryq-Qazyna», Munaı jáne gaz mınıstrligi, «QazMunaıGaz» ulttyq kompanııasy men «Atameken odaǵy» birlesip arnaıy ınstıtýt qurýlary kerek. Onda mamandardy iriktep jınaýlary kerek. Qazir halyqtyń arasynda 5 paıyz adamdar múldem jańa energetıkany jasap shyǵarý týraly jıi oılap júredi. Biz munda «jasyl» ekonomıka týraly aıtyp otyrmyz», - dedi N. Nazarbaev.

Elbasy bul rette «jasyl» ekonomıkanyń jańa ekonomıka emes ekenin, onyń bizge eńbek ónimdiligin bermeıtinin, alaıda bıýdjettik qarajattyń kóp mólsheri soǵan jumsalatynyn aıtyp ótti.

«Degenmen, munymen, ekologııamen, qorshaǵan ortany tazartýmen aınalysýǵa tıispiz. Al jańa energetıka adamnyń aqylynan týady, zerthanalarda paıda bolady. Álemdegi sekildi bizde de shaǵyn bolsa da adamdar toby osyndaı jańa energetıka týraly oılaný ústinde», - dedi Memleket basshysy.

Sóz arasynda Elbasy uly fızık Nıkola Tesla týraly sóz qozǵap, onyń ótken ǵasyrda energııanyń aınaladaǵy, jerdegi, aýadaǵy, aspandaǵy orny jaıyndaǵy zertteýlerine toqtaldy. Prezıdenttiń aıtýynsha, álgi fızık dál sol energııanyń qupııasyn asha otyryp, onyń joıqyn qabiletin kórgennen soń, bárin sol mezette-aq qurtyp tastaǵan-mys. «Biz de jurt arasynan osyndaı «tótenshe» jańalyq ashýǵa umtylatyndardy, soǵan qumarlardy taýyp, solarǵa múmkindik jasaıyq. Shetelden shaqyrtaıyq. Eń bastysy umtylys, qozǵalys bolýy kerek. Bolashaqtyń energııasy sonda ǵana bolady», - dedi N. Nazarbaev.