Prezıdent Mustafa Kemal Atatúrik kesenesine zııarat etti
ANKARA. KAZINFORM — Memleket basshysynyń Túrkııa Respýblıkasyna resmı sapary osy eldiń negizin qalaýshy ári tuńǵysh Prezıdenti Mustafa Kemal Atatúriktiń kesenesinen bastaldy. Bul týraly Aqorda málim etti.
— Qazaqstan Prezıdenti Anytqabir kesenesine jerlengen uly qaıratkerdiń rýhyna taǵzym etip, Qurmetti qonaqtar kitabyna qoltańba qaldyrdy. Qasym-Jomart Toqaev Qazaqstan men Túrkııanyń dostyǵy nyǵaıa beretinine senim bildirip, baýyrlas túrik halqynyń ósip-órkendeýine tilektestigin jetkizdi. Gúl shoǵyn qoıý rásimine Qazaqstannyń resmı delegatsııasynyń músheleri de qatysty, — delingen habarlamada.
Eske sala keteıik, Memleket basshysy Túrkııaǵa resmı saparmen barǵan edi.
Áýejaıda eki el prezıdentteri az-kem áńgimelesip, Qasym-Jomart Toqaev «Bizdi tek týystyq, yntymaqtastyq baılanystyrady» degen edi.
Qazaqstan Prezıdentiniń kelýine oraı Ankara kósheleri arnaıy bannermen bezendirildi.
