Prezıdent munaı tasymaldaýdyń balama baǵyttaryna qatysty saýalǵa jaýap berdi

ASTANA. KAZINFORM – Prezıdent Qasym-Jomart Toqaev Al Jazeera telearnasyna bergen eksklıýzıv suhbatynda munaı tasymaldaýdyń balama baǵyttaryna qatysty saýalǵa jaýap berdi.

Al Jazeera: Ótken jyly S&P Global agenttigi Qazaqstan munaıynyń shamamen 80 paıyzy KQK jelisi arqyly Reseıge ketip jatqanyn aıtqan edi. Muny ózgertý qajet dep sanamaısyz ba? Qazaqstan úshin bul strategııalyq álsizdik bolyp eseptelmeı me?

– Reseı Qazaqstannyń strategııalyq seriktesi, tikeleı kórshimiz ári odaqtasymyz ekenin esh esten shyǵarmaýymyz qajet. Reseımen arany álemdegi eń uzyn shekara bólip jatyr. Biz Reseıge strategııalyq seriktesimiz retinde arqa súıeımiz, ásirese KQK jelisine senim artamyz. Taıaýda ǵana Prezıdent Pýtınmen telefon arqyly sóılestim jáne biz KQK jelisine qatysty máselelerdi talqylaǵanymyzdy jasyrmaımyn. Qazaqstan munaıyn Reseı arqyly Eýropa naryǵyna jáne odan basqa jerlerge tasymaldaý úshin KQK tıimdi qural retinde turaqty túrde qyzmet ete beredi dep sanaımyn. 

Al Jazeera: Sonda Sizdi Ýkraınadaǵy soǵystyń yqpaly jáne Qazaqstan munaıyn atalǵan qubyr arqyly Eýropaǵa jetkizý múmkindigi qanshalyqty mańyzdy ekeni alańdatpaı ma?

– Árıne, biz Ýkraınadaǵy ahýaldy, Reseı men Ýkraına arasyndaǵy áskerı qaqtyǵys bizdiń tabıǵı resýrstar men olardy halyqaralyq naryqqa eksporttaýǵa qatysty strategııalyq josparlarymyzǵa yqpal etetinin esepke alamyz. Degenmen Reseı elimizdiń strategııalyq seriktesi ekenine de nyq senimdimiz. Biraq bul bizdi tek bir ǵana kólik baǵdarymen nemese baǵytpen shekteledi degendi bildirmeıdi. Sondyqtan siz Baký-Jeıhan, Orta dáliz qubyr jelisi syndy ózge baǵyttary jaıynda óte durys aıtyp otyrsyz. Al shetelge tasymaldanatyn nemese eksporttalatyn munaı kólemi turǵysynan alǵanda, qalaı desek te, basymdyq KQK-ǵa beriledi jáne ol solaı bolýǵa tıis.