Prezıdent múmkindigi shekteýli balalardy qoldaýǵa 58 mlrd teńge bólýdi tapsyrdy

NUR-SULTAN. QazAqparat – Prezıdent Qasym-Jomart Toqaev múmkindigi shekteýli balalardy medıtsınalyq jáne áleýmettik turǵyda qoldaý úshin aldaǵy úsh jylda 58 mlrd teńge bólýdi tapsyrdy, dep habarlaıdy QazAqparat tilshisi.

«Otbasy ınstıtýtyn qoldaý, ınklıýzıvti qoǵam qurý, balalardyń quqyǵyn qorǵaý, turmystyq zorlyqqa qarsy kúresý – bizdiń jumysymyzdyń basym baǵyttarynyń biri bolýy kerek. Jasóspirimder arasyndaǵy sýıtsıdtiń kóbeıýýi bizdi alańdatýy tıis. Zorlyq-zombylyqtan zardap shekken balalardy ońaltýǵa arnalǵan baǵdarlamany ázirleýimiz kerek. Múmkindigi shekteýli balasy bar otbasylarmen de erekshe jumys júrgizgen abzal. Tek resmı statıstıkaǵa súıensek, elimizde múmkindigi shekteýli 80 myń bala bar. Úkimet sal aýrýyna shaldyqqan balalardy medıtsınalyq jáne áleýmettik turǵydan qoldaý jumysyna mańyz berýi tıis», - dedi Memleket basshysy Qazaqstan halqyna Joldaýynda. Prezıdent erekshe qamqorlyqty qajet etetin balalarǵa teń múmkindik jasalýy tıis ekenin atap ótti. «Men bul týraly ózimniń saılaý aldyndaǵy tuǵyrnamamda aıttym. Endi Úkimetke bul baǵytta aldaǵy úsh jylda 58 mlrd teńge bólýdi tapsyramyn», - dedi Memleket basshysy. Eske sala ketsek, elordada QR Parlamenti palatalarynyń birlesken otyrysy ótip jatyr. Jıyn barysynda Qazaqstan Prezıdenti Qasym-Jomart Toqaev Qazaqstan halqyna alǵashqy Joldaýyn jarııalaýda.