Prezıdent Muhtar Maǵaýınniń otbasyna kóńil aıtty

ASTANA. KAZINFORM - Memleket basshysy Qazaqstannyń halyq jazýshysy Muhtar Maǵaýınniń otbasy men jaqyn-jýyqtaryna kóńil aıtý jedelhatyn joldady, dep habarlaıdy Aqordanyń baspasóz qyzmeti.

Prezıdent Qasym-Jomart Toqaev asa kórnekti jazýshy, Memlekettik syılyqtyń laýreaty Muhtar Maǵaýınniń dúnıeden ótýine baılanysty onyń otbasy men jaqyn-jýyqtaryna kóńil aıtty.

– Muhtar Muqanuly ǵıbratty ǵumyryn kıeli sóz ónerine arnaǵan, ulttyq ádebıetimiz ben tarıhymyzdyń kókjıegin keńeıtýge eleýli úles qosqan zańǵar tulǵa edi. Tól rýhanııatymyzdyń tórge ozýyna, ult tarıhnamasynyń tasqa basylýyna óziniń alǵa qoıǵan asyl muratymen, qaıtpas qajyr-qaıratymen qaltqysyz eńbek sińirdi. Halyq jazýshysynyń qýatty qalamynan týǵan shyǵarmalary, tarıhı eńbekteri, estelik-esseleri qalyń oqyrmannyń júreginen óz ornyn tapty. Sońyna baı ádebı mura qaldyryp, ónegeli ómir súrgen Muhtar Muqanulynyń qaıtalanbas esimi halqymyzdyń jadynda saqtalady. Marqumnyń ımany salamat, jany jánnatta bolsyn, – delingen jedelhatta.

Osyǵan deıin Muhtar Maǵaýınniń ómirden ótkenin habarladyq.