Prezıdent: Muǵalimderdiń jańa tolqynyn daıarlaý – aıryqsha mańyzdy jumys

ASTANA. KAZINFORM – Muǵalimderdiń jańa tolqynyn daıarlaý – aıryqsha mańyzdy jumys. Bul týraly elordada ótip jatqan ustazdardyń respýblıkalyq tamyz konferentsııasynda Memleket basshysy Qasym-Jomart Toqaev aıtty.

– Bıyl bilim berý salasyna 13 myńnan astam grant bólindi. Pedagog mamandyǵy boıynsha oqyp jatqan stýdentterdiń shákirtaqysy bes jylda eki ese kóbeıdi. Jańa oqý jylynan bastap shákirtaqy 84 myń teńge bolady. Osyndaı naqty sharalardyń nátıjesinde jastardyń muǵalim bolýǵa yntasy artyp keledi. Byltyr 1800-ge jýyq «Altyn belgi» ıegeri pedagog mamandyǵyna oqýǵa túsken. Al, bıyl 2 myńnan astam úzdik túlek ustaz mamandyǵyn tańdap otyr. Bul – barlyq «Altyn belgi» ıegerleriniń 23 paıyzǵa jýyǵy degen sóz. Munyń bári qoǵamda ustazdardyń abyroı-bedeliniń arta túskenin ańǵartady, - dedi Qasym-Jomart Toqaev.

Memleket basshysynyń aıtýynsha, muǵalimniń biligin, mártebesin kóterý jáne bilim sapasyn arttyrý úshin basqa da kóptegen sharalar atqaryldy. Nátıjesi jaman emes.

– Bıyl oqýshylarymyz álemdegi eń bedeldi jeti olımpıadadan 27 medal aldy. Budan bólek, halyqaralyq olımpıadalardan 1000-ǵa jýyq medal ıelendi. Bul, árıne, ul-qyzdarymyzdyń sapaly bilimi men tereń izdenisi jáne ustazdardyń qajyrly eńbeginiń jemisi. Men jaqynda osyndaı bir top oqýshyny Aqordaǵa arnaıy shaqyryp, marapattadym. Olar qazaqtyń zııatker ult ekenin búkil álemge tanytyp júr. Jalpy, naqty jetistikter az emes. Biraq, arqany keńge salýǵa bolmaıdy. Sebebi, alda atqarylatyn sharýa odan da kóp, - dedi Prezıdent.

Memleket basshysynyń paıymynsha, muǵalimder memlekettik mańyzy bar jumysty atqaryp jatyr.