Prezıdent «Moıynty – Qyzyljar» baǵytynda jańa temir jol qurylysyn bastaýdy tapsyrdy

ASTANA. KAZINFORM – Memleket basshysy Qasym-Jomart Toqaev Úkimettiń keńeıtilgen otyrysynda kólik ınfraqurylymyn damytýdaǵy basym baǵyttardy atady.

- Endi kólik-logıstıka ınfraqurylymyna toqtalaıyq. Tranzıt – júk tasymalyna qatysty halyqaralyq básekedegi bizdiń orasan zor artyqshylyǵymyz. Muny tolyqtaı ári tıimdi paıdalanýymyz kerek. Qazaqstan arqyly ótetin temir jol dálizin damytý jumysyn tezdetý qajet. Bul joba Transkaspıı baǵdarynyń negizgi bóligi bolmaq. Osy baǵyttaǵy mańyzdy jobalardyń birazy qazir júzege asyrylyp jatyr. Aldyn ala qamdanyp, jumysty toqtatpaı, jalǵastyra berý kerek, - dedi Prezıdent.

Qasym-Jomart Toqaev Qazaqstan aýmaǵy Ortalyq Azııa men Qytaı arasyndaǵy júk aınalymyn ulǵaıtýǵa qolaıly ekenin eske saldy.

- «Moıynty – Qyzyljar» baǵytynda jańa temir jol qurylysyn bastaýdy tapsyramyn. Sondaı-aq Qyzyljar beketinen Aqtaý portyna deıingi kúre joldyń qozǵalysy asa kóp ýchaskelerin jańǵyrtý kerek. «Altynkól – Jetigen» temir jolyn da keńeıtý qajet. Bul Qytaı men Ortalyq Azııa arasyndaǵy kólik dáliziniń áleýetin edáýir arttyrady. Budan bólek, temir jol tasymalyn tsıfrlandyrý jobalaryn ýaqtyly aıaqtaý mańyzdy. Mýltımodaldy kólik toraptaryn damytýǵa basa mán bergen jón. Sol arqyly tasymaldyń barlyq túrin ózara kiriktirýge múmkindik týady. Bıyl jáne kelesi jyly osy baǵytta aýqymdy jumystar atqarylýǵa tıis, - dedi Prezıdent.

Aıta keteıik elordada Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.  Іs-sharany ashqan Prezıdent Úkimet pen ákimder jumysynyń tıimdiligi azamattardyń turmys sapasyna qaraı baǵalanatyn aıtty. Sonymen qatar, Prezıdent taqtatas munaı kenishterin ekonomıkalyq aınalymǵa engizý týraly jáne Úkimet pen ulttyq kompanııalar jasandy ıntellekt tehnologııasyn engizýdi qolǵa alý kerek ekenin aıtqan bolatyn.