Prezıdent mıkro jáne shaǵyn bıznesti tekserýge úsh jylǵa moratorıı engizý máselesin talqylaýdy usyndy
ASTANA. KAZINFORM — Qazaqstan halqyna Joldaýyn jarııalaý kezinde Prezıdent Qasym-Jomart Toqaev kásipkerlikke kedergi keltirmeý máseleleri jóninde málimdedi.
Onyń sózinshe, memleket ekonomıkamyzdaǵy mańyzdy tapsyrys berýshi bolyp otyr.
– Sondyqtan shaǵyn jáne orta bıznesti memlekettik organdar men kvazımemlekettik kompanııalardyń satyp alýlaryna tartý tásilderin jetildirý qajet. Satyp alynatyn taýarlar men qyzmetterdiń belgili bir kólemin shaǵyn jáne orta kásiporyndarǵa rezervte qaldyrýǵa bolady. Sonymen qatar jetkizýshilerge qoıylatyn talaptardy jeńildetý kerek. Kásipkerler úshin turaqty ári boljamdy «oıyn erejelerin» qamtamasyz etý asa mańyzdy. Memlekettik baqylaý júıesi jetkilikti dárejede lıberaldy bolǵanymen, aıyppuldar, jospardan tys tekserýler jáne shottardy buǵattaýǵa ákep soǵatyn kameraldyq baqylaý arqyly kásiporyndardyń jumysyna yqpal etý jalǵasyp keledi – dedi Prezıdent.
Memleket basshysy mundaı yqpaldy oń qubylys dep aıtýǵa bolmaıtynyn jetkizdi.
Máselen, bıylǵy birinshi jartyjyldyqta jeke kásipkerler tarapynan anyqtalǵan zańbuzýshylyqtar sany 34%-ǵa azaıǵan.
Alaıda aıyppuldardyń jalpy somasy shamamen 11%-ǵa ósken, al jospardan tys tekserýler sany ondaǵan ese artqan.
Sonymen birge iskerlik belsendilikti taldaý bıznestiń qalypty jumys isteýi úshin oǵan kedergi keltirmeýdiń ózi jetkilikti ekenin kórsetedi.
– Osy turǵydan alǵanda, 2020–2023 jyldary mıkro jáne shaǵyn bıznesti tekserýge engizilgen moratorııdiń tájirıbesi paıdaly. Onyń tıimdiligi dáleldendi. Quryltaı depýtattaryna Úkimetpen birlesip, aldyńǵy moratorııdiń barlyq oń jáne teris tustaryn eskere otyryp, 2027 jylǵy 1 qańtardan bastap taǵy da úsh jyldyq moratorıı engizýdiń oryndylyǵyn talqylaýdy usynamyn. Bul qadamdy baqylaý-qadaǵalaý júıesin qaıta jańǵyrtýǵa jáne retteýdiń tsıfrlyq modeline kóshýge múmkindik beretin strategııalyq úzilis retinde qarastyrǵan jón, – dedi Prezıdent.
Aıta keteıik, buǵan deıin Toqaev bızneske qoldan zańsyz tosqaýyl jasaý – memleketke qarsy jasalǵan qylmys degen bolatyn.
