Prezıdent: Memorgan basshylary «100 jańa esim» jeńimpazdarymen kezdesip turýy kerek

NUR-SULTAN. QazAqparat – «Qazaqstannyń 100 jańa esimi» jobasynyń jeńimpazdary ortalyq memlekettik organdardyń basshylarymen turaqty kezdesip turýy kerek. Prezıdent Qasym-Jomart Toqaev joba fınalısterimen kezdesýinde osyndaı tapsyrma berdi, dep habarlaıdy QazAqparat tilshisi.

Memleket basshysy Táýelsizdiktiń 30 jyldyǵy qarsańynda júıeli jańǵyrtýlar arqyly jańa serpilistiń negizin salý qajettigin atady.

«Joǵaryda aıtqanymdaı, biz memlekettiligimiz úshin mańyzdy osynaý mereıtoıdy azamattardyń muqtajdyqtary men qajettilikterine baǵyttalǵan naqty ister men jobalarmen tolyqtyrýǵa tıispiz. «100 jańa esim» jobasy jeńimpazdarynyń qyzmeti men bastamalary osy ózekti mindetke tolyq jaýap beredi. Olardyń ıdeıalary men usynystaryn neǵurlym tıimdi ilgeriletý úshin fınalısterdiń ortalyq memlekettik organdardyń basshylarymen turaqty kezdesýler praktıkasyn júıeli negizde engizý qajet. Meniń oıymsha, bul ózara paıdaly bolady», - degen Memleket basshysy elimizdiń talantty jastary kásipqoılyqtyń jańa belesterin baǵyndyrý arqyly týymyzdy bıikke kótere beretinine senim bildirdi.