Prezıdent Memlekettik tý kóterý rásimine qatysty

Qurmet qaraýylynyń bastyǵy saltanatty is-sharaǵa daıyndyǵy týraly Prezıdentke raport berdi. Sodan keıin elimizdiń ánurany shyrqalyp, kók baıraǵymyz kóterildi.

Óz sózinde Prezıdent bul kún – qazaq eliniń árbir azamaty úshin mańyzy erekshe mereke ekenin atap ótti. Biz osy kúni baıraǵymyzdy bıikke kóteremiz. Sol arqyly eńseli, egemen el ekenimizdi kúlli álemge pash etemiz.

– Qasterli rámizderimiz – ult qundylyqtarynyń jarqyn sımvoly. Memleketimizdiń ár nyshany – halqymyzdyń bolmys-bitiminiń kórinisi sanalady. Eltańba – eldigimizdiń aıshyqty belgisi. Ánuran – qazaqtyǵymyzdyń aıbyndy úni. Kók týymyz – Táýelsizdik tumary. Tóbemizge kóterip, qadir tutatyn osy úsh rámizdi memlekettigimizdiń myzǵymas úshtaǵany desek, artyq bolmaıdy. Tarıhqa úńilsek, jurtymyz árqashan bir týdyń astyna jınalyp, yntymaq-birligin saqtaı bilgen. Qazir de elimiz aýyzbirshiligin nyǵaıtyp, alǵa qaraı senimmen qadam basyp keledi, – dedi Qasym-Jomart Toqaev.

Bıyl naýryz aıynda el azamattary jalpyulttyq referendýmǵa qatysyp, konstıtýtsııalyq reformany qoldap, daýys berdi. Osylaısha, jańa Konstıtýtsııa qabyldanyp, tól tarıhymyzdyń jańa paraǵy ashyldy.

– Ata zańda halqymyzdyń san ǵasyrlyq arman-tilegi, maqsat-muraty kórinis tapty. Keń baıtaq jerimizdiń tutastyǵy, elimizdiń egemendigi, azamattardyń quqyqtary jáne bostandyqtary basty qundylyqtar dep jazyldy. Zań men tártipti saqtaý, bilim men ǵylymdy, jańa tehnologııalardy damytý tazalyqty dáripteý, tabıǵatty qorǵaý, volonterlik qyzmetti qoldaý Konstıtýtsııada aıqyndaldy. Túbegeıli jańa sıpatqa ıe bolǵan Ata zańymyz ádiletti Qazaqstannyń myzǵymas jarǵysyna aınaldy, – dedi Memleket basshysy.

Konstıtýtsııada memlekettik rámizderge aıryqsha mártebe berilgen jáne árbir adam elimizdiń memlekettik rámizderin qurmetteýge tıis dep kórsetilgen.

– Ulttyq nyshandarymyzdy qadirleý – otanshyldyq rýhynyń eń bıik ólshemi ekeni sózsiz. Naǵyz patrıottar ǵana eldiń kóshin alǵa bastaıdy. Eldiń shetin jaýdan qorǵaıdy. Basqa sózben aıtqanda otanshyldyq degenimiz – jerimizdiń qaýipsizdiginiń jáne turaqtylyǵynyń kepili. Ult rámizderiniń mártebesin arttyrý – asa mańyzdy memlekettik jumys. Taıaý arada Úkimet memlekettik rámizderdi oryndy paıdalaný máselesi boıynsha qaýlyǵa qajetti túzetýlerdi engizedi. Ulttyq nyshandarymyzdy ulyqtaý – ortaq paryz. Bul ár azamattyń mindeti. Túptep kelgende, rámizderdi qasterleý – memleketti qurmetteý degen sóz, – dedi Qasym-Jomart Toqaev.

Aıta keteıik, 4 maýsymda elimizde Memlekettik rámizder kúni atap ótiledi. Osydan 34 jyl buryn táýelsiz Qazaqstannyń óz Eltańbasy, Týy jáne Ánurany bekitildi.

Qazaqstan baıraǵy Reddit platformasyndaǵy Flags of the World Tournament onlaın-týrnırinde álemdegi eń úzdik memlekettik tý dep tanyldy. 

Qazaqstannyń memlekettik rámizderi Arktıkalyq dúnıejúzilik arhıvke saqtaýly.